Devara-2 : దేవర-2పై కొరటాల శివ ఇంట్రెస్టింగ్ అప్‌డేట్స్.. సీక్వెల్ లో బాలీవుడ్ స్టార్స్..

Devara-2

Devara-2 : యంగ్ టైగర్ ఎన్టీఆర్‌  హీరోగా కొరటాల శివ దర్శకత్వంలో తెరకెక్కిన చిత్రం ‘దేవర’ సెప్టెంబర్ 27న ప్రపంచ వ్యాప్తంగా విడుదల కాగా, కనివినీ ఎరుగని విజయంతో దూసుకుపోతున్నది. ఈ సినిమా విజయాన్ని హీరో ఎన్టీఆర్ తో పాటు టీమ్ అంతా ఆస్వాదిస్తోంది.  దేవర-2 ఎప్పుడెప్పుడా అని అభిమానులు ఇప్పటి నుంచే ఆశలు పెంచుకుంటున్నారు. ఇక ఈ సినిమా తర్వాత యంగ్ టైగర్ ఎన్టీఆర్ వార్-2లో తన పార్ట్ కు సంబంధించిన షూటింగ్ చేస్తున్నారు.

ఇక  ఎన్టీఆర్ అభిమానులు దేవర సక్సెస్ మానియా నుంచి బయటకు రాలేకపోతున్నారు. సీక్వెల్‌కు సంబంధించిన అప్‌డేట్స్‌ కోసం ఆత్రుతగా ఎదురుచూస్తున్నారు. ఈ సినిమా ప్రచారంలో భాగంగా దర్శకుడు ఓ ఇంటర్వ్యూలో పలు ఆసక్తికర విషయాలు వెల్లడించాడు. ఈ సీక్వెల్‌లో మరికొందరు బాలీవుడ్‌ స్టార్స్‌ స్ర్కీన్ షేర్ చేసుకునే అవకాశం ఉందన్నారు. అయితే ఇది ఆచరణలో సాధ్యమవుతుందో లేదో ఇప్పుడే చెప్పలేమన్నారు.  సీక్వెల్ లో  రణ్‌వీర్‌ సింగ్‌, రణ్‌బీర్‌ కపూర్‌ ఉంటే బాగుంటుందనే అభిప్రాయాన్ని వ్యక్తం చేశారు. ఇది వర్కౌ్ట్ అయితే బాగానే  ఉంటుందన్నారు. అయితే మరిన్ని వివరాలు చెప్పడం భావ్యం కాదన్నారు .తెలుగు, తమిళ సినీ ఇండస్ట్రీల నటీనటుల పేర్లు చెబితే ఇప్పటి నుంచే ఊహాగానాలు ఎక్కువవుతాయన్నారు. ‘దేవర2’లో అతిథి పాత్రలు కూడా ఉంటాయని, అవి సినిమాలో చాలా కీలకమని చెప్పారు. త్వరలోనే ఆ వివరాలు వెల్లడిస్తానని చెప్పారు డైరెక్టర్ కొరటాల శివ.

పార్ట్ -1 విజయవంతం కావడంతో ‘దేవర 2’పై  దర్శకుడు కొరటాల శివ రోజురోజుకూ అంచనాలు పెంచేస్తున్నారు. మొదటిభాగం కంటే రెండోభాగం మరింత పవర్‌ఫుల్‌గా ఉంటుందంటున్నారు. పార్ట్‌ 1లో ఎన్టీఆర్ ను పది శాతమే చూపించామని, సీక్వెల్ లో 100శాతం ఎన్టీఆర్ నట విశ్వరూపం చూస్తారని చెప్పారు. ప్రతీ పాత్రలో ట్విస్ట్‌ ఉంటుందంటూ క్యూరియాసిటీ పెంచేస్తున్నారు. ఎన్టీఆర్‌ కూడా ఈ సీక్వెల్‌ గురించి ప్రస్తావించారు. ఫస్ట్ పార్ట్ సక్సెస్ తో తమ బాధ్యత మరింత పెరిగిందని చెప్పుకొచ్చారు.  సీక్వెల్‌ మరింత బాగుంటుందని చెబుతున్నారు.