Salar:స‌లామ్ రాఖీభాయ్.. అంటూ కేజీఎఫ్ రాఖీభాయ్ యష్ సృష్టించిన హంగామా అంతా ఇంతా కాదు. కేజీఎఫ్ 2 చిత్రం 1000 కోట్ల వ‌సూళ్ల‌తో సంచ‌ల‌నం సృష్టించింది. రాఖీ భాయ్ గా యష్ ఆహార్యం, భారీ యాక్షన్ స్టార్ గా అత‌డి ప్ర‌తిభ తెర‌కు క‌ట్టి ప‌డేశాయి. అయితే స‌లార్ లో రాఖీభాయ్ ఎంట్రీ ఉంటుందంటూ గత కొన్ని రోజులుగా మీడియాలో క‌థ‌నాలొస్తున్నాయి.
మోస్ట్ అవైటెడ్ పాన్ ఇండియన్ చిత్రం సలార్లో యష్ అతిధి పాత్రలో నటించే అవకాశం గురించి నిరంతరం చర్చలు జరుగుతున్నాయి. ప్రశాంత్ నీల్ దర్శకత్వం వహించిన ఈ యాక్షన్ డ్రామా మ‌రో వారం రోజుల్లో రిలీజ్ కానుండ‌గా ఈ టాపిక్ యువ‌త‌రంలో వాడి వేడిగా చ‌ర్చ‌కు వచ్చింది. అయితే స‌లార్ లో యష్ న‌టించాడా లేదా? అన్న‌దానికి ఇప్పుడు అధికారికంగా స‌మాచారం అందింది.
తాజా స‌మాచారం మేర‌కు సలార్లో కేజీఎఫ్ స్టార్ యష్ అతిథిగా క‌న‌పించ‌డం లేదని తెలిసింది. ఇదే విషయాన్ని చిత్ర నిర్మాత విజయ్ కిరగందూర్ ఓ ఇంటర్వ్యూలో తెలిపారు. నిర్మాత కిరంగ‌దూర్ మాట్లాడుతూ `కేజీఎఫ్‌కి సాలార్‌కు సంబంధం లేదని ప్రశాంత్ నీల్ ఇప్పటికే స్పష్టం చేశారు. కాబట్టి యష్ అతిధి పాత్ర గురించి వచ్చిన పుకార్లు పూర్తిగా అవాస్తవం` అని అన్నారు.
సాలార్‌లో పృథ్వీరాజ్ సుకుమారన్, శ్రుతి హాసన్, జగపతి బాబు, శ్రీయా రెడ్డి, రామచంద్రరాజు, ఈశ్వరి రావు, తదితరులు కీలక పాత్రల్లో నటించారు. ఈ చిత్రం 2023 డిసెంబర్ 22న విడుదల కానుంది. స‌లార్ విడుద‌ల‌కు ఒక రోజు ముందు షారూఖ్ ఖాన్ న‌టించిన డంకీ విడుద‌ల‌వుతుంది. ఇదే సీజ‌న్ లో హాలీవుడ్ భారీ చిత్రం ఆక్వామేన్ 2 కూడా విడుదల కానుంది.