KCR
KCR : తనకు సిద్దిపేట కళాశాలలో విద్య చెప్పిన గురువును సోమవారం జగిత్యాలలో కేసీఆర్ కలిశారు. బస్సుయాత్రలో భాగంగా ఆదివారం జగిత్యాలలో బస చేసిన కేసీఆర్, స్థానికంగా నివాసం ఉంటున్న తన చిన్ననాటి గురువు ప్రముఖ కవి జైశెట్టి రమణయ్య సార్ ఇంటికి వెళ్లి ఆశీర్వాదం తీసుకున్నారు.
ఆదివారం జగిత్యాలలో రోడ్ షో నిర్వహించిన కేసీఆర్ ఈ సందర్భంగా తన గురువు, కవి రమణయ్యను గుర్తు చేసుకున్నారు. రోడ్ షో తర్వాత రాత్రి ఎమ్మెల్సీ ఎల్ రమణ నివాసంలో బస చేశారు. సోమవారం సాయంత్రం నిజామాబాద్ రోడ్ షోకు వెళ్లడానికి ముందు రమణయ్య ఇంటికి వెళ్లి పరామర్శించారు. ప్రస్తుతం అనారోగ్యంతో మంచం నుంచి కదలలేని స్థితిలో ఉన్న గురువుకు పాదాభివందనం చేశారు. ఆయన యోగక్షేమాలు అడిగి తెలుసుకున్నారు. ఈ సందర్భంగా రమణయ్య తాను రచించిన పుస్తకాలను కేసీఆర్ కు అందజేశారు. ఈ కార్యక్రమబలో ఎమ్మెల్సీ ఎల్ రమణ, ఎమ్మెల్యే డాక్టర్ ఎం. సంజయ్ కుమార్, జడ్పీ ఛైర్ పర్సన్ వసంత తదితరులు ఉన్నారు.