Kalki 2898 AD
Kalki 2898 AD : ప్రభాస్-నాగ్ అశ్విన్ కాంబోలో వచ్చిన ‘కల్కి 2898 ఏడీ’ బాక్సాఫీస్‌ వద్ద సరికొత్త రికార్డులు సృష్టిస్తూ కాసుల వర్షం కురిపిస్తోంది. ప్రపంచ వ్యాప్తంగా 11 రోజుల్లో ఈ మూవీ రూ.900 కోట్లకు (గ్రాస్‌) పైగా వసూలు చేసినట్లు చిత్ర బృందం తెలిపింది. ఇప్పుడు మరో అరుదైన మైలురాయికి చేరువలో ఉంది. ఇదే హవా కొనసాగితే ఒకటి, రెండు రోజుల్లో రూ.1000 కోట్ల మార్కును అందుకోవడం లాంఛనమే. ఈ ఘనత సాధించిన ఏడో భారతీయ చిత్రంగా ‘కల్కి’ నిలుస్తుంది.
హిందీ ప్రేక్షకులు ‘కల్కి’కి ఫిదా అవుతున్నారు. ప్రభాస్, అమితాబ్‌ యాక్షన్‌ సీక్వెన్స్‌, నాగ్ అశ్విన్ టేకింగ్‌, విజువల్‌ ఎఫెక్ట్స్‌, తదితర సన్నివేశాలు వారిని విశేషంగా ఆకట్టుకుంటున్నాయి. ఈ క్రమంలో బాలీవుడ్‌లో రూ.200 కోట్లు (గ్రాస్‌) వసూలు చేసిన సినిమాగా ‘కల్కి’ నిలిచింది. బాహుబలి, ఆర్ఆర్ఆర్ తర్వాత హిందీలో రూ.200 కోట్లు వసూలు చేసిన తెలుగు మూవీ ఇదే కావడం గమనార్హం. ఇక ప్రభాస్ సినిమాల పరంగా చూస్తే ఇది రెండో అత్యధిక గ్రాస్‌ వసూళ్లు సాధించిన చిత్రంగా చెప్పుకోవచ్చు.
నార్త్‌ అమెరికాలో ఇప్పటి వరకు ఏ దక్షిణాది చిత్రం సాధించని అరుదైన ఫీట్‌ను ‘కల్కి’ సొంతం చేసుకుంది. ఇప్పటి వరకు 16 మిలియన్ డాలర్లు వసూలు చేసినట్లు ట్రేడింగ్‌ వర్గాలు అంచనా వేశాయి. ‘బుక్‌ మై షో’లో కోటికి పైగా టికెట్ల విక్రయించిన చిత్రంగానూ రికార్డు సృష్టించింది.
ప్రపంచ వ్యాప్తంగా రూ.1000 కోట్లకు పైగా వసూళ్లు (గ్రాస్‌) సాధించిన చిత్రాలివే!
* దంగల్‌ – 2016 రూ.2,024 కోట్లు
* బాహుబలి2 – 2017 రూ.1,810 కోట్లు
* ఆర్ఆర్ఆర్ – 2022 రూ. 1,387 కోట్లు
* కేజీయఫ్‌2 – 2022 రూ.1,250 కోట్లు
*జవాన్‌ – 2023 రూ.1,148 కోట్లు
* పఠాన్‌ – 2023) రూ.1,050 కోట్లు