Jai Balayya
Jai Balayya : జై బాలయ్య..జై బాలయ్య ఎక్కడికి వెళ్లినా ఈ పేరుకున్న క్రేజ్ తగ్గదు. అనంతపురం.. అమలాపురం.. చివరకు అమెరికా అయినా జై బాలయ్య స్లోగన్ కున్నా పవర్ మరే పేరుకు లేదనే చెప్పాలి. జై బాలయ్య స్లోగన్ కు ఉన్నా క్రేజ్ ను చూసి తమన్ ఏ ముహూర్తాన ట్యూన్ కట్టాడో గాని జై బాలయ్య సాంగ్ ఖండాంతరాలు దాటిపోతోంది.
వేదిక ఏదైనా జై బాలయ్య నినాదం మార్మోగాల్సిందే. ప్రచార సభ..రోడ్ షో..సినిమా థియేటర్లు.. ఏ సందులో చూసినా జై బాలయ్య నినాదమే. నందమూరి నటవారసుడిగా తెరంగ్రేటం చేసిన బాలకృష్ణ తనదైన సినిమాలతో తెలుగు ఇండస్ట్రీలో టాప్ హీరోగా నిలబడ్డారు. ఆయన కెరీర్ తొలినాళ్లలో చేసిన సినిమాలు ఒక ఎత్తయితే..గత పదేళ్లుగా చేస్తున్న సినిమాలు మరో ఎత్తు అని చెప్పక తప్పదు. సమరసింహరెడ్డితో ఫ్యాక్షన్ హీరోయిజానికి బాలయ్య బ్రాండ్ గా నిలిచాడు. నరసింహనాయుడు, లెజెండ్, అఖండ..ఇలా అన్నీ బ్లాక్ బస్టర్లే. అందుకే ఆరు పదులు దాటినా ఇంకా జై బాలయ్య దుమ్మురేపుతున్నాడు.
వరుస హిట్లతో నేటి యువతను సైతం తన ఫ్యాన్స్ గా మార్చుకుంటున్నాడు బాలయ్య. గత నలభై ఏండ్లుగా ఆయన సినిమాలు చేస్తున్న అప్పటి తరంతో పాటు నేటి తరాన్ని బాలయ్య అలరిస్తున్నాడు. అందుకే నేటితరం ఏ చోటకు వెళ్లినా బాలయ్య నినాదాలతో మోతమోగిస్తున్నారు. తాజాగా నిన్న హైదరాబాద్ లో జరిగిన ఎస్ఆర్ హెచ్, పంజాబ్ మ్యాచ్ లో ‘జై బాలయ్య..’’ సాంగ్ కు ఉప్పల్ స్టేడియం దద్దరిల్లిపోయింది. వేలమంది జై బాలయ్య నినాదాలతో హోరెత్తించారు. అద్భుతమైన ఈ దృశ్యాన్ని ఎంతో మంది సెల్ ఫోన్లలో సెల్ఫీ తీసుకోవడమే కాదు..వీడియోలు తీసి సోషల్ మీడియాలో షేర్ చేస్తున్నారు.
