Gaza : గాజాపై ఇజ్రాయెల్ దాడి.. 27 మంది మృతి

Israel attack on Gaza

Gaza : గాజాపై దాడులు ఆపాలని అంతర్జాతీయ దేశాలు సూచిస్తున్నా ఇజ్రాయెల్ మాత్రం పట్టించుకోవడం లేదు. గాజాపై ఇజ్రాయెల్ దాడికి పాల్పడుతూనే ఉంది. తాజాగా గాజాలోని నుసిరత్ లో ఉన్న ఓ పాఠశాలపై వైమానిక దాడి చేసింది. ఈ ఘటనలో 27 మంది ప్రాణాలు కోల్పోయారు. అనేక మంది గాయపడ్డారు. స్కూల్ లో హమాస్ మిలిటెంట్లు ఆశ్రయం పొందుతున్నారనే సమాచారంతో ఈ దాడికి పాల్పడినట్లు ఇజ్రాయెల్ సైన్యం తెలిపింది. గత ఏడాది అక్టోబర్ 7న ఇజ్రాయెల్ పై దాడిలో పాల్గొన్న ఉగ్రవాదులు ఇక్కడ తలదాచుకుంటున్నారని పేర్కొంది. దాడికి ముందు ప్రాణ నష్టం జరగకుండా చర్యలు తీసుకున్నామని పేర్కొంది. అయితే యుద్ధం కారణంగా నిర్వాసితులైన ప్రజలకు పాఠశాల ఆశ్రయం కల్పిస్తోందని స్థానిక మీడియా వెల్లడించింది.

ఇజ్రాయెల్ వాదనలను హమాస్ తిరస్కరించింది. హమాస్ ఆధ్వర్యంలోని మీడియా కార్యాలయం డైరెక్టర్ ఇస్మాయిల్ అల్-తవాబ్తా మాట్లాడుతూ ఇజ్రాయెల్ తప్పుడు కథనాలు ప్రచారం చేస్తోందని తెలిపారు. పాఠశాలలో నిరాశ్రయులైన ప్రజలే ఆశ్రయం పొందుతున్నారని తెలిపారు. క్రూరమైన నేరాన్ని జమర్థించుకోవడానికే ఇజ్రాయెల్ సైన్యం ప్రయత్నిస్తోందని వెల్లడించారు. కాగా, ఇప్పటి వరకు ఇజ్రాయెల్-హమాస్ యుద్ధంలో ఇప్పటి వరకు 36,000 మందికి పైగా పాలస్తీనియన్లు మృతి చెందారు.