Allu Arjun : అల్లు అర్జున్ ను ట్రోల్ చేస్తున్నది ఆ పార్టీ వాళ్లేనా? సొంత ఇమేజ్ బిల్డ్ చేసుకుంటున్నందుకేనా!
Allu Arjun Trolls
Allu Arjun : సినిమా కెరీర్ మొదట్లో అల్లు అర్జున్ విమర్శలు ఎదుర్కొన్న విషయం తెలిసిందే. అయితే బన్నీ తన వెనకున్న బ్యాక్ గ్రౌండ్ తో సినిమాల్లో హీరోగా ఎంట్రీ ఇవ్వలేదు. హీరోగా అడుగు వేయడానికి దాని వెనక ఎంతో కష్టముందో ఆ తర్వాత అందరికీ తెలిసింది. సినిమాల్లో రాణించాలంటే గ్లామర్, బ్యాక్ గ్రౌండ్ ఒక్కటే సరిపోదని గుర్తించాడు. నటనతో పాటు డ్యాన్సులు, ఫైట్లతో కూడా అభిమానులను అలరించాలని నిర్ణయం తీసుకున్నాడు.
సినిమాల్లో రావాలనే కోరికతో జిమ్నాస్టిక్స్, డ్యాన్స్ లో ప్రత్యేకంగా శిక్షణ తీసుకున్నాడు. ఆ కష్టం బన్నీ ప్రతి సినిమాలో కనిపిస్తుంది. అల్లు అర్జున్ డ్యాన్సు్ల్లో ఎలా చెలరేగిపోతాడో తెలిసిందే. టాలీవుడ్ హీరోల్లో టాప్ -5 డ్యాన్సర్లలో బన్నీ ముందుంటాడు. ఇక తెలుగులో తొలిసారి సిక్స్ ప్యాక్ తో కనిపించిన హీరో బన్నీనే కావడం విశేషం. ఇలా ఎన్నో ప్రత్యేకతలున్న బన్నీ హీరోగా ఎంట్రీ ఇచ్చిన కొత్తలో చాలా విమర్శులు ఎదుర్కొన్నాడు. వాటి అన్నింటినీ తట్టుకొని హీరోగా తన స్థానాన్ని పదిలం చేసుకున్నాడు.
ఇక పుష్ప సినిమాతో దేశవ్యాప్తంగా సంచలనం సృష్టించగా, మరోసారి ఆ మ్యాజిక్ చేసేందుకు సిద్ధమవుతున్నాడు. పుష్ప-2 ప్రీ రిలీజ్ బిజినెస్ లెక్కలతో బాలీవుడ్ సైతం షాకవుతున్నది. ఇలాంటి తరుణంలో ఏపీలో బన్నీ ఇమేజ్ ను డ్యామేజ్ చేయడానికి ఓ పార్టీ ప్రయత్నిస్తున్నదనే ఆరోపణలు వస్తున్నాయి. ఏపీలో జరిగిన అసెంబ్లీ, పార్లమెంట్ ఎన్నికల్లో అల్లు అర్జున్ వైసీపీ అభ్యర్థికి ప్రచారం చేయడంతో మెగా ఫ్యామిలీతో విభేదాలు పొడచూపాయని ప్రచారం జరుగుతున్నది. అటు మెగా ఫ్యామిలీ గానీ, ఇటు అల్లు ఫ్యామిలీ గానీ ఇప్పటి దాకా స్పందించలేదు. కానీ వివిధ సందర్భాల్లో వారు చేసే వ్యాఖ్యలను వక్రీకరిస్తూ గొడవలున్నాయని రూమర్లు క్రియేట్ చేస్తున్నారు.
ఒకటి రెండు సందర్భాల్లో జనసేన నాయకులు కూడా నేరుగా అల్లు అర్జున్ ను కౌంటర్ చేశారు. దీనిపై బన్నీ ఫ్యాన్స్ కూడా సోషల్ మీడియాలో గట్టిగానే సమాధానమిచ్చారు. ఆ తర్వాత జనసేన నుంచి ఎవరూ కామెంట్ చేయడం లేదు. కానీ కొందరు వైసీపీ కార్యకర్తలు మాత్రం పుష్ప-2 పోస్టర్లను తమకు అనుకూలంగా మార్చకుంటున్నారు. మాకు అడ్డు ఎవడూ లేడు అంటూ కొటేషన్లు రాస్తుండడంతో పరోక్షంగా జనసేనతో గిచ్చి కయ్యం పెట్టుకుంటున్నట్లుగా కనిపిస్తున్నది. పార్టీల మధ్య వైరం ఎలా ఉన్నా ఆ ప్రభావం బన్నీ పైన పడుతున్నది. ఇదే ముదిరితే రేపటి కల్లా పుష్ప-2 కలెక్షన్లపై ప్రభావం చూపే ప్రమాదం ఉన్నది. ఇప్పటికైనా బన్నీ తేరుకోకపోతే ప్రమాదం తప్పేలా లేదు.