Reels Morphing : ఇన్ స్టా రీల్స్ మార్ఫింగ్.. పోలీసులకు అక్కాచెల్లెళ్ల ఫిర్యాదు

Reels Morphing : ఇన్ స్టా రీల్స్ మార్ఫింగ్ చేసి దూషిస్తున్న యువకుడిపై పోలీసులకు అక్కాచెల్లెళ్లు ఫిర్యాదు చేశారు. తమ ఫొటోలతో మార్ఫింగ్ వీడియోలు సృష్టించి, అసభ్యకరమైన పదజాలంతో దూషిస్తున్న యువకుడిపై పశ్చిమగోదావరి జిల్లా తాడేపల్లి గూడేనికి చెందిన అక్కాచెల్లెళ్లు విజయవాడ సైబర్ క్రైం పోలీసులకు ఫిర్యాదు చేశారు. తాము ఇన్ స్టా వీడియోలు తీసి, అప్ లోడ్ చేస్తామని, వాటిని డౌన్ లోడ్ చేసి ముఖాలు మార్చి నగ్న చిత్రాలుగా తయారు చేసి గంగాధర్ అనే యువకుడు వేధిస్తున్నాడని వారు ఫిర్యాదులో వెల్లడించారు. సోమవారం వారు విజయవాడలోని సైబర్ క్రైం సీఐకి విన్నవించారు.

కృష్ణా జిల్లా మోపిదేవికి చెందిన గంగాధర్, ఈ వీడియోలు తయారుచేసి సభ్య సమాం వినలేని భాషతో నెల రోజుల నుంచి తమను వేధిస్తున్నాడని బాధితులు పేర్కొన్నారు. సీఐ స్పందించి, న్యాయం చేస్తానని హామీ ఇచ్చారు. నిందితుడి పరిధి కృష్ణా జిల్లా కావడంతో ఆన్ లైన్ లో సైబర్ విభాగంలో ఫిర్యాదు చేయాలని సీఐ సూచించారు. దీంతో వారు ఆన్ లైన్ ఫిర్యాదు చేయగా.. సంబంధిత ఫిర్యాదు అవనిగడ్డ పోలీస్ స్టేషన్ కు వెళ్లింది. అవనిగడ్డ పోలీస్ స్టేషన్ కు వెళ్లి కలుస్తామని అక్కాచెల్లెళ్లు తెలిపారు.