YCP Ali : జగన్ చెప్తే ఎక్కడ్నుంచైనా నేనూ రెడీ!

YCP Ali

YCP Ali : ఏపీలో మరో రెండు నెలల్లో ఎన్నికలు రాబోతున్నాయి. ఎటు చూసినా ఎన్నికల సందడే కనిపిస్తోంది. సభలు, పొత్తుల చర్చలు, సీట్ల సర్దుబాట్లు..ఇలా నేతలు బిజీబిజీగా మారిపోయారు. ఈ సారి ఎన్నికల్లో పలువురు సినిమా నటులు తమ రాజకీయ అదృష్టాన్ని పరీక్షించుకోబోతున్నారు.

సీనియర్ హాస్య నటుడు అలీ వైసీపీలో ఉన్న విషయం తెలిసిందే. ఆయన ఏపీ ప్రభుత్వ సలహాదారుగా ఉన్నారు. తాజాగా ఆయన రాజమహేంద్రవరంలో తాను ఎన్నికల్లో పోటీ చేసే విషయమై ఆసక్తికర విషయాలు వెల్లడించారు. రాబోయే అసెంబ్లీ ఎన్నికల్లో ఎక్కడి నుంచి పోటీ చేస్తాననే విషయం తనకు కూడా తెలియదని అన్నారు. ముఖ్యమంత్రి జగన్మోహన్ రెడ్డి పిలిచి ‘ఫలానా చోటు నుంచి పోటీ చేయ్’ అని అంటే అందుకు సిద్ధంగా ఉన్నానని చెప్పారు.

ఈ వారంలో కబురు రావొచ్చని అలీ ఆశాభావం వ్యక్తం చేశారు. ఏ పార్టీలో ఉన్నా, పోటీలో నిలబడిన వ్యక్తి మంచివారైతే ప్రజలు గెలిపిస్తారన్నారు. అక్కడి నుంచి ఇక్కడికి..ఇక్కడి నుంచి అక్కడికి పార్టీలు మారిన వారు చాలామంది ఉన్నారని, ఎవరు ఏమిటనేది ప్రజలే నిర్ణయిస్తారని చెప్పుకొచ్చారు. ఎవరితో ఎవరు పొత్తు పెట్టుకున్నా, అంతిమ నిర్ణయం ఓటరుదేనన్నారు. ‘‘ఎన్నికలకు మేం సిద్ధమంటున్నాం.. వాళ్లూ సిద్ధం అంటున్నారు..చూద్దాం ఏం జరుగుతుందో’’నని అన్నారు.

గత ఎన్నికల్లోనే పోటీ చేయాలని తనను అడిగారని, అయితే క్షేత్రస్థాయిలో సమస్యలు తెలుసుకోకుండా రాజకీయాల్లో అడుగుపెడితే ఇబ్బందిపడుతానన్న ఉద్దేశంతో తాను పోటీ చేయలేదన్నారు. అంతేకాకుండా ఒప్పుకున్న సినిమాలకు అన్యాయం జరుగుతుందన్న కారణంతోనే పోటీకి తిరస్కరించానని చెప్పారు.