Shakalaka Shankar : జనసేన కోసం లక్షలు ఖర్చు చేస్తే..కనీసం పవన్ ఫోన్ కూడా చేయలేదు..షకలక శంకర్ ఆవేదన

Pawan Kalyan-Shakalaka Shankar

Shakalaka Shankar : పిఠాపురం నియోజకవర్గం నుంచి పవన్ కల్యాణ్ ను గెలిపించడమే లక్ష్యంగా జబర్దస్త్ ఆర్టిస్టులు చాలానే కష్టపడ్డారు. హైపర్ ఆది, ఆటో రామ్ ప్రసాద్..తదితరులు ఎమ్మెల్యేగా గెలిపించడానికి మండుటెండల్లో ఇంటింటి ప్రచారం సైతం చేశారు. అయితే మాజీ జబర్దస్త్ నటుడు షకలక శంకర్ మాత్రం పవన్ కల్యాణ్ పై సంచలన వ్యాఖ్యలు చేశారు. జనసేన పార్టీ కోసం సొంత డబ్బులు ఖర్చు చేయగా తన భార్య అలిగి చాలా రోజులు మాట్లాడలేదని, నువ్వు అంత చేస్తే పవన్ కల్యాణ్ నీకు ఏం చేశాడని ప్రశ్నించారని శంకర్ వాపోయాడు. ప్రస్తుతం షకలక శంకర్ వ్యాఖ్యలు ఏపీ పాలిటిక్స్ లో హాట్ టాపిక్ గా నిలిచాయి.

జబర్దస్త్ నటుల్లో పవన్ కల్యాణ్ వీరాభిమానుల్లో షకలక శంకర్ ఒకరు. పవన్ మ్యానరిజంతోనూ షోల్లో అలరించేవాడు. ఆయనపై అభిమానంతో 2019 ఎన్నికల్లో జనసేనను గెలిపించడానికి షకలక శంకర్ ఒక్కరే ప్రచారం నిర్వహించారు. ఈ ఎన్నికల్లో జనసేన కార్యకర్తలకు, పవన్ అభిమానులకు రూ.3 లక్షలతో భోజనాలు పెట్టించానని శంకర్ తెలిపారు. దీంతో చేతిలో ఉన్న డబ్బంతా ఆవిరి అయిపోయాయన్నారు. ఇంట్లో వాళ్లు అడిగితే కొత్త సినిమాలు ఒప్పుకున్నానని, అడ్వాన్సులు వచ్చాయని చెప్పాను. వాళ్లు నేను డబ్బులు తీసుకొస్తున్నానని అనుకున్నారు. తీరా చేతిలో చిల్లిగవ్వ లేదని, చివరకు మా ఫ్రెండ్ తో వెయ్యి రూపాయల డీజిల్ కొట్టించుకుని ఇంటికి వెళ్లానని తెలిపారు. డబ్బులు ఖర్చు చేశానని మా ఆవిడకు చెబితే నాలుగు రోజులు తనతో మాట్లాడలేదని చెప్పుకొచ్చారు. ఈ సమయంలో తమ మావయ్య అడిగిన ప్రశ్నలకు తన దగ్గర సమాధానం లేదని వాపోయాడు.

పవన్ కల్యాణ్ పై ప్రేమతో ఇంత చేశావ్..ఆయన నీకు కనీసం ఫోన్ చేశాడా? తిరిగి నీకు పవన్ కల్యాణ్ ఏం చేశాడని తమ మావయ్య ప్రశ్నించారని తెలిపారు. అవును నిజమే కదా అనిపించిందన్నారు. తాను శ్రీకాకుళంలో చేస్తే ఆయనకు తెలుస్తుందా? అనుకున్నాను.. ఒక వేళ తెలిసి కూడా పెద్దగా ఉపయోగం ఉండకపోవచ్చని షకలక శంకర్ అభిప్రాయపడ్డారు.