Prabhas : మీరుంటేనే నేను హీరో.. లేదంటే జీరో. ప్రభాస్ నోట సంచలన కామెంట్స్
Prabhas
Prabhas : రెబల్ స్టార్ ప్రభాస్ నటించిన తాజా సినిమా కల్కి 2898 ఏడీ. పాన్ ఇండియా స్థాయిలో డైరెక్టర్ నాగ్ అశ్విన్ ఈ మైథాలజీ అండ్ సైన్స్ ఫిక్షన్ థ్రిల్లర్ ను తెరకెక్కించారు. బాలీవుడ్ బ్యూటీ దీపికా పదుకొణె ఫీమేల్ లీడ్ రోల్ చేయగా, బిగ్ బీ అమితాబ్ బచ్చన్ కీలక పాత్ర పోషించాడు. లోక నాయకుడు కమల్ హాసన్ విలన్ గా చేశారు. దిశా పటానీ, రాజేంద్ర ప్రసాద్, శోభన లాంటి సౌత్, నార్త్ స్టార్లు ఈ క్రేజీ ప్రాజెక్టులో భాగస్వాములయ్యారు. జూన్ 27న థియేటర్లలోకి వచ్చిన ఈ సినిమా భారతదేశంతో పాటు విదేశాల్లోనూ బాక్సాఫీస్ రికార్డులను తిరగరాస్తోంది. విడుదలైన రెండు వారాల్లోనే ఏకంగా రూ. 1000 కోట్లకు పైగా వసూళ్లు రాబట్టింది. ప్రభాస్ కటౌట్ కు తగ్గ సినిమా పడితే ఎలా ఉంటుందో ఈ సినిమా కలెక్షను్ల మరోసారి నిరూపించాయి.
ఇండియా లో అత్యధిక కలెక్షన్లు కొల్లగొట్టిన చిత్రాల్లో టాప్ -7లో కల్కి కూడా చేరింది. ఇండియాలో రెండు సార్లు వెయ్యి కోట్లు సాధించిన రికార్డు ఇప్పటి వరకు బాలీవుడ్ బాద్ షా షారూక్ ఖాన్ కు ఉండగా, ఆ రికార్డును సమం చేశాడు. అయితే బాలీవుడ్ బాద్ షా రెండు సినిమాలు కూడా లాంగ్ రన్ లో వెయ్యి కోట్లు కొల్లగొట్టినవే. కానీ ప్రభాస్ మాత్రం తొలి రెండు వారాల్లోనే ఈ ఫీట్ ను సాధించిన హీరోగా సరికొత్త రికార్డు సృష్టించాడు. నార్త్ అమెరికాలో అత్యధిక కలెక్షన్లు సాధించిన సినిమా గా కల్కి మరో రికార్డును సాధించింది. కాగా కల్కి బ్లాక్ బస్టర్ హిట్ కావడంపై రెబల్ స్టార్ ప్రభాస్ స్పందించారు. తన అభిమానులకు ప్రభాస్ థ్యాంక్స్ చెబుతూ ప్రత్యేక వీడియో విడుదల చేశాడు. ప్రస్తుతం ఈ వీడియో సామాజిక మాధ్యమాల్లో వైరలవుతోంది.
‘నా అభిమానులందరికీ నమస్కారం… ఇంత పెద్ద హిట్టు అందించినందుకు మీకు ప్రత్యేక ధన్యవాదాలు… మీరు లేకపోతే నేను జీరోనే… థాంక్యూ నాగ్ అశ్విన్. మా ఇద్దరిది దాదాపు ఐదేళ్ల ప్రయాణం. ఇంత పెద్ద సినిమాను నాకు అందించినందుకు వైజయంతి మూవీస్‌ కు , నిర్మాతలకు నా ధన్యవాదాలు.. అద్భుతమైన క్వాలిటీతో పెద్ద సినిమాను ఆడియన్స్ కు అందించారు. అశ్వినీదత్ గారు ఎంతో ధైర్యమున్న నిర్మాత. ఆయన పెట్టిన ఖర్చును చూసి నేను చాలా కంగారు పడ్డాను. మీరు సినిమా కోసం చాలా ఖర్చు చేస్తున్నారు సార్ అని అశ్వినీదత్ గారికి చెప్పాను. కానీ ఆయన మాకెంతో ధైర్యం చెప్పారు. వద్దు.. వద్దు.. పెద్ద హిట్టు ఇస్తాం, కంగారుపడకండి, బెస్ట్‌ క్వాలిటీ సినిమా తీయాలి అని ఆయన మాకు కొండంత బలాన్నిచ్చారు . నిర్మాతలు స్వప్న, ప్రియాంకలకు కూడా నా ధన్యవాదాలు. ఇలాంటి అవకాశం నాకు ఇచ్చినందుకు ప్రతి ఒక్కరికీ నా ప్రత్యేక కృతజ్ఞతలు. అలాగే హీరోయిన్ దీపిక, కమల్ సార్, అమితాబ్ సార్, దిశా పటానీకి మనస్ఫూర్తిగా నా అభినందనలు’.. అంటూ పోస్ట్ చేశారు.