Errabelli Dayakar Rao : అసెంబ్లీ ఎన్నికల్లో ఓడిపోతానని నాకు ముందే తెలుసు: ఎర్రబెల్లి దయాకర్ రావు

Errabelli Dayakar Rao

Errabelli Dayakar Rao : అసెంబ్లీ ఎన్నికల్లో తాను ఓడిపోతానని ముందే తెలుసని, ఆ విషయాన్ని కేసీఆర్ కు కూడా చెప్పానని మాజీ మంత్రి ఎర్రబెల్లి దయాకర్ రావు తెలిపారు. శనివారం ఆయన విలేకరుల సమావేశంలో మాట్లాడారు. అసెంబ్లీ ఎన్నికల్లో ఓడిపోతానని నాకు ముందే తెలుసని, అందుకే ఎన్నికలకు 3 నెలల ముందే తన సీటు మార్చాలని కేసీఆర్ ను కోరానని చెప్పారు. శాసన సభ ఎన్నికల్లో బీఆర్ఎస్ 40 సీట్లు మాత్రమే గెలుస్తుందని, మరో 20 స్థానాల్లో సిట్టింగ్ లను మార్చాలని ముందే సూచించానని అన్నారు. అందులో భాగంగానే తన స్థానాన్ని కూడా మార్చాలని కోరినట్లు తెలిపారు. వరంగల్ బీఆర్ఎస్ ఎంపీ అభ్యర్థి సుధీర్ కుమార్ 50 వేల ఓట్ల మెజార్టీతో గెలుస్తారని జోస్యం చెప్పారు.

వరంగల్ లో రెండో స్థానం కోసమే బీజేపీ, కాంగ్రెస్ పోటీ పడుతున్నాయని పేర్కొన్నారు. అబద్దాలు, మోసాల్లో కడియం శ్రీహరి, సీఎం రేవంత్ రెడ్డి ఇద్దరూ ఒక్కటేనని విమర్శించారు. సీఎం రేవంత్ రెడ్డి మోదీతో సంబంధాలు పెట్టుకున్నారని ఆరోపించారు.