Jammu and Kashmir : జమ్మూ కాశ్మీర్‌లో హై అలెర్ట్
Jammu and Kashmir : జమ్మూ కాశ్మీర్ లోయలో ఉగ్రదాడి ముప్పు పొంచి ఉన్న నేపథ్యంలో హై అలెర్ట్ ప్రకటించారు. పాకిస్తాన్ కేంద్రంగా పనిచేస్తున్న ఉగ్రవాద సంస్థ లష్కరే తోయిబా (ఎల్‌ఈటీ) అనుబంధ సంస్థ అయిన ది రెసిస్టెన్స్ ఫ్రంట్ (టీఆర్‌ఎఫ్) మళ్లీ దాడులకు పాల్పడే అవకాశం ఉందని ఇంటెలిజెన్స్ బ్యూరో (ఐబీ) హెచ్చరికలు జారీ చేసింది. ఇటీవలే పహల్ గాంలో జరిగిన ఉగ్రదాడిలో 26 మంది అమాయక పర్యాటకులు ప్రాణాలు కోల్పోయిన నేపథ్యంలో ఈ హెచ్చరికలు మరింత ఆందోళన కలిగిస్తున్నాయి.
ఐబీ హెచ్చరికల నేపథ్యంలో భద్రతా బలగాలు అప్రమత్తమయ్యాయి. లోయ వ్యాప్తంగా భద్రతను గణనీయంగా పెంచారు. ముఖ్యంగా పర్యాటక ప్రదేశాలైన శ్రీనగర్, గుల్మార్గ్, సోనామార్గ్ వంటి ప్రాంతాలలో భద్రతా ఏర్పాట్లను పటిష్టం చేశారు. పర్యాటకుల భద్రతకు అత్యంత ప్రాధాన్యత ఇవ్వాలని ఉన్నతాధికారులు ఆదేశాలు జారీ చేశారు.
ఇంటెలిజెన్స్ వర్గాల సమాచారం ప్రకారం, ఉగ్రవాదులు పర్యాటక ప్రదేశాలతో పాటు రైల్వే మౌలిక సదుపాయాలు, కాశ్మీరీ పండిట్లు మరియు ఇతర రాష్ట్రాల నుండి వచ్చి పనిచేస్తున్న వారిని లక్ష్యంగా చేసుకునే అవకాశం ఉంది. ఈ నేపథ్యంలో అన్ని సున్నిత ప్రాంతాలలో నిఘాను పెంచారు. అదనపు బలగాలను మోహరించి, వాహనాల తనిఖీలను ముమ్మరం చేశారు. అనుమానాస్పద కదలికలపై నిశితంగా దృష్టి సారించారు.
ఇటీవలి పహల్ గాం దాడికి ముందు భద్రతా లోపాలు జరిగినట్లు ప్రభుత్వం అంగీకరించిన నేపథ్యంలో, భవిష్యత్తులో ఇలాంటి దుర్ఘటనలు జరగకుండా పటిష్టమైన చర్యలు తీసుకుంటున్నారు. పర్యాటక సీజన్ కావడంతో పెద్ద సంఖ్యలో దేశీయ, విదేశీ పర్యాటకులు లోయకు వస్తున్నారు. వారి భద్రతకు భరోసా కల్పించేందుకు అన్ని రకాల చర్యలు చేపట్టినట్లు భద్రతా వర్గాలు తెలిపాయి. స్థానికులు కూడా అప్రమత్తంగా ఉండాలని, అనుమానాస్పద వ్యక్తులు లేదా వస్తువులు కనిపిస్తే వెంటనే భద్రతా బలగాలకు సమాచారం అందించాలని అధికారులు సూచించారు. లోయలో భద్రతా పరిస్థితిని నిరంతరం సమీక్షిస్తున్నట్లు తెలిపారు.