Vishnu Vishal:తుపాన్ ఎఫెక్ట్‌..సాయం కోరిన హీరో..చివ‌రికి మ‌రో స్టార్ ప్ర‌త్య‌క్ష్యం!

Vishnu Vishal:మిగ్‌జాం తుపాను ప్ర‌భావంతో త‌మిళ‌నాడులోని ప‌లు ప్రాంతాలు నీట మునిగాయి. భారీ వ‌ర్షాల‌కు చెన్నైలోని జ‌న జీవ‌నం స్థంభించింది. ఈ క్ర‌మంలో తాను నివాసం ఉండే ప్రాంతంలోని ప‌రిస్థితిని వివ‌రిస్తూ హీరో విష్ణు విశాల్ సోష‌ల్ మీడియా వేదిక‌గా పోస్ట్ పెట్టారు. ఇంటిపై నిల‌బ‌డి చుట్టూ నీటితో త‌మ ప్రాంతం నిండిపోయిన ఫొటోలు షేర్ చేశారు. తాను నివ‌సిస్తున్న కార‌ప్పాకంలోని ఇంట్లోకి వ‌ర‌ద నీరు వ‌చ్చింద‌ని, క్ర‌మంగా ఉదృతి పెరుగుతోంద‌ని తెలిపారు.

`విద్యుత్తు , ఇంట‌ర్నెట్ లేదు. ఫోన్ సిగ్న‌ల్ కూడా స‌రిగా అంద‌డం లేదు. ఇంటిపై ఓ చోట మాత్ర‌మే సిగ్న‌ల్ వ‌స్తోంది. అక్క‌డి నుంచే ఇది పోస్ట్ చేస్తున్నా. నాకు, ఇదే ప్రాంతంలో ఉండే వారికి స‌హాయం అందుతుంద‌ని ఆశిస్తున్నా. చెన్నై ప్ర‌జ‌ల అవ‌స్థను చూస్తుంటే బాధ‌గా ఉంది` అని కోలీవుడ్ హీరో విష్ణు విశాల్ పోస్ట్ పెట్టారు. ఈ పోస్ట్ పెట్టిన కొద్ది సేప‌టికే ఫైర్, రెస్క్యూ విభాగాలు స్పందించాయి. కార‌ప్పాకం ఏరియాలో సహాయ‌క చ‌ర్య‌లు ప్రారంభించాయి.

ఈ విష‌యాన్ని హీరో విష్ణు విశాల్ మ‌రో పోస్ట్‌లో తెలియ‌జేస్తూ త‌మిళ‌నాడు ప్ర‌భుత్వానికి కృత‌జ్ఞ‌త‌లు తెలిపారు. క‌ష్ట స‌మ‌యంలో ఆదుకుంద‌ని ప్ర‌శంసించారు. అయితే హీరో విష్ణు విశాల్‌ని ఆదుకొవ‌డానికి వ‌చ్చిన రెస్క్యూ టీమ్‌తో బాలీవుడ్ మిస్ట‌ర్ ప‌ర్‌ఫెక్ట్ ఆమీర్‌ఖాన్ కూడా ప్ర‌త్య‌క్ష్యం కావ‌డం అంద‌రిని ఆశ్చ‌ర్యానికి గురి చేసింది. ఈ స‌మ‌యంలో ఆయ‌న చెన్నైలో ఏం చేస్తున్నారు? అన్న‌ది ఇప్పుడు చ‌ర్చ‌నీయాంశంగా మారింది.

కోలీవుడ్‌లో వినూత్న‌మైన సినిమాల‌తో హీరోగా పేరు తెచ్చుకున్న విష్ణు విశాల్ తెలుగు ప్రేక్ష‌కుల‌ని కూడా మెప్పించారు. అర‌ణ్య‌, ఎఫ్‌ ఐ ఆర్‌, మ‌ట్టికుస్తీ వంటి సినిమాల‌తో తెలుగులో అల‌రించారు.సూప‌ర్ స్టార్ ర‌జ‌నీకాంత్ కుమార్తె ఐశ్వ‌ర్య ద‌ర్శ‌క‌త్వంలో రూపొందుతున్న `లాల్ స‌లామ్‌` సినిమాతో త్వ‌ర‌లో ప్రేక్ష‌కుల ముందుకు రానున్నాడు. ఇందులో సూప‌ర్‌స్టార్ ర‌జ‌నీకాంత్ కీల‌క అతిథి పాత్ర‌లో క‌నిపించ‌నున్న విష‌యం తెలిసిందే.