Hanuman-2
Hanuman-2 : చిన్న సినిమాగా వచ్చి సత్తా చాటింది ‘హనుమాన్’. సంక్రాంతి బరిలో చిన్న మూవీగా వచ్చి ఏకంగా విజేతగా నిలిచింది. మహేశ్ బాబు, నాగార్జున, వెంకటేశ్ వంటి అగ్రహీరోలు పోటీలో ఉన్నా.. అన్నింటిని మించి అద్భుతమైన కలెక్షన్లతో దూసుకెళ్తోంది. మంచి కంటెంట్ ఉంటే స్టార్ హీరోలతో పనిలేదని హనుమాన్ నిరూపించింది. అప్ కమింగ్ హీరో, యువ దర్శకుడు, చిన్న నిర్మాత కలిసి చేసిన వండరే హనుమాన్ అని చెప్పక తప్పదు. కేవలం 27 కోట్లతో తీసినా ఈ మూవీ ఇప్పటికే వంద కోట్లు వసూలు చేసింది.
ఇక హనుమాన్ -2 కూడా ఉంటుందని దర్శకుడు సినిమా విడుదలకు ముందే చెప్పేశాడు. క్లైమాక్స్ లో కూడా ఆ విషయాన్ని రివీల్ చేశాడు. దానికి తగ్గట్టుగానే క్లైమాక్స్ డిజైన్ చేసిన హనుమంతుడి షాట్స్.. గూస్ బంప్స్ తెప్పించాయి. దీంతో హనుమాన్-2పై మరింత అంచనాలు పెరిగాయి. ఇప్పటికే పార్ట్-2 స్టోరీని ప్రశాంత్ వర్మ సిద్ధం చేశాడని తెలుస్తోంది.
హనుమాన్ స్టార్ హీరోలు లేకున్నా జనాల్లో విపరీతమైన ఆసక్తిని పెంచింది. ఇందులో హనుమంతుడి పాత్రే పెద్ద స్టార్. ఆయన్ను నమ్ముుకునే హనుమాన్ ను రిలీజ్ చేశారు. ఇక పార్ట్ -2లో మాత్రం హనుమంతుడి పాత్రను పూర్తి స్థాయిలో చూపించే అవకాశం ఉంది. అందుకే ఆ పాత్ర కోసం పెద్ద హీరోను రంగంలోకి దించాలని ప్రశాంత్ వర్మ ప్లాన్ చేస్తున్నాడట. అది అతిథి పాత్ర అయినా కీలకం కాబోతోంది. ఇక ఈ పాన్ ఇండియా సినిమాపై జనాల్లో విపరీతమైన అంచనాలు ఉండడంతో హనుమంతుడి పాత్రను చేయడానికి ఏ హీరో అయినా ఒప్పుకుంటాడు. మరి ఆ పాత్ర ఎవరినీ వరిస్తుందో చూడాలి. అలాగే హనుమాన్ లో విలన్ పాత్ర కాస్త బలహీనంగా ఉందన్న టాక్ వచ్చింది. అయితే పార్ట్-2లో ఓ పేరున్న పెద్ద హీరోను ఆ పాత్రలోకి తీసుకోవాలని కూడా ప్లాన్ చేస్తున్నారట.
పార్ట్-2 కథలో హాలీవుడ్ లెవల్ యాక్షన్ సీన్స్ ఉండే అవకాశం ఉంది. వందలాది మంది ఫైట్స్ ఉండేట్టుగా హనుమాన్ క్లైమాక్స్ సీన్ చూస్తే అర్థమవుతోంది. హనుమాన్ ఫుల్ క్రేజ్ రావడంతో నిర్మాత కూడా పార్ట్-2 కోసం ఎంతైనా ఖర్చు చేయాలని ఫిక్స్ అయినట్టు సమాచారం. హనుమాన్-2 కు సంబంధించిన వివరాలు త్వరలోనే ప్రశాంత్ వర్మ చెప్పే అవకాశాలు కనపడుతున్నాయి.