Hanu-Man Trailer:చైల్డ్ ఆర్టిస్ట్‌గా అంద‌రి హృద‌యాల్ని కొల్ల‌గొట్టిన తేజ స‌జ్జ హీగా విభిన్న‌మైన సినిమాల్లో న‌టిస్తున్నాడు. ఆయ‌న న‌టిస్తున్న తాజా పాన్ ఇండియా మూవీ `హ‌ను మాన్`. ఇండియ‌న్ సూప‌ర్ హీరో ఫిల్మ్‌గా ఈ చిత్రాన్ని ద‌ర్శ‌కుడు ప్ర‌శాంత్ వ‌ర్మ త‌న సినిమాటిక్ యూనివ‌ర్స్ నేప‌థ్యంలో అత్యంత భారీ స్థాయిలో రూపొందిస్తున్నారు. ఫాంట‌సీ వ‌రల్డ్ అంజ‌నాద్రి నేప‌థ్యంలో సాగే విజువ‌ల్ వండ‌ర్‌గా ఈ మూవీని తెర‌కెక్కిస్తున్నారు. అమృతా అయ్య‌ర్ క‌థ‌నాయిక‌గా న‌టిస్తోంది.
వ‌ర‌ల‌క్ష్మీ శ‌ర‌త్ కుమార్, విన‌య్ రాయ్‌, రాజ్ దీప‌క్ శెట్టి కీల‌క పాత్ర‌ల్లో న‌టిస్తున్నారు. దాదాపు 11 భాష‌ల్లో ప్ర‌పంచ వ్యాప్తంగా జ‌న‌వ‌రి 12న భారీ స్థాయిలో ప్రేక్ష‌కుల ముందుకు రాబోతోంది. షూటింగ్ పూర్తి చేసుకుని రిలీజ్‌కు సిద్ధంగా ఉన్న ఈ సినిమా రిలీజ్ కొన్ని నెల‌లుగా వాయిదా ప‌డుతూ వ‌చ్చింది. భారీ సినిమాలు సంక్రాంతికి వ‌స్తుండ‌టంతో `హ‌ను మాన్`ని వాయిదా వేస్తూ వ‌చ్చారు. ఫైన‌ల్ గా సంక్రాంతి పండ‌గ రేసులో భారీ సినిమాలు ఎన్ని ఉన్నా మేము కూడా వ‌స్తున్నామంటూ ఇటీవ‌ల రిలీజ్ డేట్‌ని ప్ర‌క‌టించారు.
తాజాగా మంగ‌ళ‌వారం `హ‌ను మాన్` ట్రైల‌ర్‌ని మేక‌ర్స్ విడుద‌ల చేశారు. అండ‌ర్ వాట‌ర్ విజువ‌ల్స్‌తో ట్రైల‌ర్ మొద‌లైంది. అతీత శ‌క్తుల‌తో అజేయుడిగా నిల‌వాల‌ని ఓ క్రూరుడు ప్ర‌య‌త్నించడం..నీకు క‌న‌ప‌డుతుంది ఒక‌డి ఉన్మాదం మాత్ర‌మే..కానీ దాని వెనుక ఒక ఉప‌ద్ర‌వం దాగి ఉంది.. అంటూ స‌ముద్ర‌ఖ‌ని చెప్ప‌డం… క‌లియుగంలో ధ‌ర్మం కోసం పోరాడే ప్ర‌తి ఒక్క‌రి వెంటా ఉన్నాడు…నీ వెంటా ఉన్నాడు…వంటి డైలాగ్‌లు ఆస‌క్తిని రేకెత్తిస్తున్నాయి. సినిమాపై అంచ‌నాల్ని పెంచేస్తున్నాయి.
చిరుత‌తో తేజ పోటీప‌డుతూ ప‌రుగెత్తే స‌న్నివేశాలు, అండ‌ర్ వాట‌ర్ లోని దృశ్యాలు, అంజ‌నాద్రికి సంబంధించిన విజువ‌ల్స్ ..ఇవ‌న్నీ వెర‌సి `హ‌ను మాన్` ఓ విజువ‌ల్ వండ‌ర్‌గా క‌నిపిస్తంది. స‌రికొత్త సినిమాల కోసం ఎదురు చూసే ప్రేక్ష‌కుల‌కు `హ‌ను మాన్` స‌రికొత్త అనుభూతిని క‌లిగించ‌డం ఖాయంగా క‌నిపిస్తోంది. టీజ‌ర్‌తో ఆక‌ట్టుకున్న `హ‌ను మాన్` ట్రైల‌ర్‌తో మ‌రింత బ‌జ్‌ని క్రియేట్ చేసుకుని ఇండియ‌న్ బాక్సాఫీస్ వ‌ద్ద రికార్డులు సృష్టిస్తుంద‌న్న‌ది తెలియాలంటే జ‌న‌వ‌రి 12 వ‌ర‌కు వేచి చూడాల్సిందే.
