Guntur Karam : ‘గుంటూరు కారం’.. దిల్ రాజు దెబ్బ ఇలా ఉంటది
Guntur Karam – Dil Raju
Guntur Karam – Dil Raju : దిల్ రాజు.. తెలుగు సినిమా ఇండస్ట్రీలో పరిచయం అక్కరలేని పేరు. ఇంకా చెప్పాలంటే తెలుగు సినిమాని శాసించే పేరు. డిస్ట్రిబ్యూటర్‌గా మొదలై.. ఈ రోజు టాలీవుడ్ అగ్ర నిర్మాతలలో ఒకరిగా విరజిల్లుతున్న దిల్ రాజు.. సక్సెస్‌ఫుల్ నిర్మాతగా తన హవా కొనసాగిస్తూనే ఉన్నారు. ఈ మధ్య దిల్ రాజుపై టాలీవుడ్‌లో భారీ స్థాయిలో వ్యతిరేకత వచ్చినా.. ఆ ప్రభావం మాత్రం ఆయనపై ఇసుమంత కూడా పడలేదు. ఆయన డిస్ట్రిబ్యూట్ చేసే చిత్రాల నిర్మాణ సంస్థలు కొన్ని కొత్తగా డిస్ట్రిబ్యూషన్‌లోకి దిగినా.. తన మార్క్‌ని ప్రదర్శిస్తూనే ఉన్నాడు. ఎవరు ఎన్ని చేసినా.. ఎక్కడ నొక్కాలో అక్కడ నొక్కేస్తున్నాడీ సక్సెస్‌ఫుల్ నిర్మాత.
తనని కాదని మైత్రీ మూవీస్ సంస్థ సొంతంగా డిస్ట్రిబ్యూషన్‌లోకి దిగిన విషయం తెలిసిందే. ఆ సంస్థ డిస్ట్రిబ్యూట్ చేసిన లేటేస్ట్ సెన్సేషనల్ చిత్రం ‘సలార్’. ఈ సినిమా తర్వాత రాబోయే సంక్రాంతికి మైత్రీ సంస్థ ‘హనుమాన్’ను నైజాంలో డిస్ట్రిట్యూట్ చేస్తోంది. మరోవైపు సూపర్ స్టార్ మహేష్ బాబు, త్రివిక్రమ్ శ్రీనివాస్ కాంబినేషన్‌లో రూపుదిద్దుకుంటోన్న ‘గుంటూరు కారం’ చిత్రాన్ని నైజాం ఏరియాలో దిల్ రాజు డిస్ట్రిబ్యూట్ చేస్తున్నారు. నైజాంలో దిల్ రాజుని కొట్టేటోడు లేడనేది ఇప్పటికే పలు సందర్భాల్లో రుజువైంది. ఇప్పుడు మరోసారి అది రిపీట్ కాబోతోంది.
‘గుంటూరు కారం’ చిత్రాన్ని నైజాంలో దిల్ రాజు మ్యాగ్జిమమ్ థియేటర్లలో విడుదల చేసేందుకు ప్లాన్ చేస్తున్నారు. థియేటర్ల వారితో దిల్ రాజుకి ఉండే సంబంధమే వేరు. ఆయన ఏదంటే అదే అంటారు థియేటర్ యాజమాన్యం. మొదటి నుండి దిల్ రాజు అలా మెయింటైన్ చేస్తూ వస్తున్నారు. ఇప్పుడు దిల్ రాజుకి సరైన టైమ్ వచ్చింది. అందుకే తన సత్తా చాటేందుకు పావులు కదుపుతున్నాడు. అది ఎంతలా అంటే.. ఒక్క హైదరాబాద్‌లో 96 సింగిల్ స్క్రీన్స్ ఉండగా.. అందులో 90 స్ర్కీన్లు డే1 ‘గుంటూరు కారం’ సినిమాకు లాక్ చేసి పెట్టాడట. ఇప్పుడీ వార్తపై టాలీవుడ్‌లో హాట్‌హాట్‌గా చర్చలు నడుస్తున్నాయి.
అంతేకాదు, మిగతా చోట్ల కూడా అన్ని థియేటర్లలో ఎర్లీ మార్నింగ్ షో ‘గుంటూరు కారం’ చిత్రాన్నే ప్రదర్శించేలా ఏర్పాట్లు చేస్తున్నట్లుగా టాక్ వినిపిస్తోంది. అంటే.. ‘హనుమాన్’ కోసం బుక్కయిన థియేటర్లలో కూడా ఎర్లీ మార్నింగ్ షోకి ‘గుంటూరు కారం’ సినిమానే ప్రదర్శించనున్నారట. ఈ లెక్క ప్రకారం చూస్తే.. ఈ స్థాయిలో థియేటర్లలో విడుదలవుతోన్న సినిమా ‘ఆర్ఆర్ఆర్’ తర్వాత ‘గుంటూరు కారం’ చిత్రమే. దిల్ రాజు టార్గెట్ చేస్తే అలా ఉంటుంది మరి. ఆయన వ్యూహాన్ని ‘హనుమాన్’ ఎలా ఎదుర్కొంటాడో చూడాలి.