Guntur Kaaram:సూప‌ర్ స్టార్ మ‌హేష్ బాబు న‌టిస్తున్న ఫ్యామిలీ యాక్ష‌న్ ఎంట‌ర్ టైన‌ర్ `గుంటూరు కారం`. మాట‌ల మాంత్రికుడు త్రివిక్ర‌మ్ ద‌ర్శ‌క‌త్వంలో హారిక అండ్ హాసిని క్రియేష‌న్స్ బ్యాన‌ర్‌పై స్టార్ ప్రొడ్యూస‌ర్ ఎస్. రాధాకృష్ణ ఈ మూవీని అత్యంత భారీ స్థాయిలో నిర్మిస్తున్నారు. క్రేజీ హీరోయిన్ శ్రీ‌లీల, మీనాక్షీ చౌద‌రి హీరోయిన్‌లుగా న‌టిస్తున్నారు. త‌మ‌న్ సంగీతం అందిస్తున్న ఈ సినిమా వ‌చ్చే ఏడాది జ‌న‌వ‌రి 12న సంక్రాంతికి ప్రేక్ష‌కుల ముందుకు రానుంది.
ఇటీవ‌ల ఈ సినిమా నుంచి `ఓ బేబీ.. `అంటూ సాగే లిరిక‌ల్ వీడియోని విడుద‌ల చేసిన విష‌యం తెలిసిందే. దీనిపై కొంత మంది అభిమానులు, నెటిజ‌న్‌లు అసంతృప్తిని వ్య‌క్తం చేయ‌డ‌మే కాకుండా ర‌చ‌యిత రామ‌జోగ‌య్య శాస్త్రిపై విమ‌ర్శ‌లు చేశారు. దీంతో ఆయ‌న కూడా నెటిజ‌న్‌ల‌పై ఎదురు దాడికి దిగ‌డం తెలిసిందే. తాజాగా ఈ సినిమాలోని మ‌రో పాట‌పై నెట్టింట రూమర్స్ మొద‌ల‌య్యాయి. ఈ నేప‌థ్యంలో ఓ నెటిజ‌న్ చేసిన కామెంట్‌పై నిర్మాత నాగ‌వంశీ కౌంటర్ ఇచ్చారు.
`గుంటూరు కారం`లోని మాస్ సాంగ్‌పై హీరో మ‌హేష్ బాబు అసంతృప్తిని వ్య‌క్తం చేశారు. దీనిపై ద‌ర్శ‌కుడు, సంగీత ద‌ర్శ‌కుడికి క్లాసు తీసుకున్నారు. ప్ర‌స్తుతం దాన్ని టీమ్ రీవ‌ర్క్ చేస్తున్నారు` అంటూ ఓ నెటిజ‌న్ కామెంట్ చేశాడు. దీనిపై నిర్మాత స్పందించారు. “గుంటూరు కారం` సినిమాలో మొత్తం నాలుగు పాట‌ల‌తో పాటు ఓ బిట్ సాంగ్ ఉంది. మూడు పాట‌ల షూటింగ్ కూడా పూర్త‌యింది. మిగిలిన ఒక్క పాట కూడా షెడ్యూల్ ప్ర‌కారం డిసెంబ‌ర్ 21 నుంచి ప్రారంభం అవుతుంది. ప్ర‌స్తుతం సోష‌ల్ మీడియాలో జ‌రుగుతున్న ప్ర‌చారంలో ఎలాంటి నిజం లేదు.
ఈ సినిమాలోని పాట‌ల గురించి జ‌రుగుతున్న‌దంతా ప్ర‌చారం మాత్ర‌మే. లైకుల కోసం కొంద‌రు ఇలాంటి త‌ప్పుడు ప్ర‌చారాల‌ను చేస్తున్నారు. మ‌హేష్ ఫ్యాన్స్ ఇలాంటి రూమ‌ర్స్‌కు స్పందిస్తార‌ని రూమర్స్ సృష్టించే వాళ్ల‌కి తెలుసు. ఇలాంటి ఫేక్ న్యూస్‌ల‌కు చిత్ర బృందం స్పందించ‌డం లేదంటే అవి ఫేక్ న్యూస్ అని అర్థం` అని పేర్కొన్నారు.