Hyderabad Metro : హైదరాబాద్ మెట్రో రెండో దశలో నాలుగు కొత్త కారిడార్లు

second phase of Hyderabad Metro

Hyderabad Metro : గత ప్రభుత్వం ప్రతిపాదించిన రూట్లను పక్కనపెట్టి హైదరాబాద్ మెట్రో రెండో దశ కోసం హైదరాబాద్ మెట్రో రైల్ లిమిటెడ్ (హెచ్ఎంఆర్ఎల్) కొత్త రూట్ మ్యాప్ ను సిద్ధం చేసింది. రెండో దశలో మొత్తం 70 కిలో మీటర్ల మేర కొత్త మెట్రో రైలు మార్గాల నిర్మాణానికి ప్రతిపాదనలు ఖరారైనట్లు హెచ్ ఎంఆర్ ఎల్ ఎండీ ఎన్వీఎస్ రెడ్డి సోమవారం ప్రకటించారు.

కొత్త మెట్రో కారిడార్లకు సంబంధించి సమగ్ర ప్రాజెక్టు నివేదికల (డీపీఆర్) తయారీ ముమ్మరంగా జరుగుతోందని, మరో మూడు నెలల్లో అవి సిద్ధమవుతాయని తెలిపారు. గత ప్రభుత్వం ప్రతిపాదించిన మార్గాలు మెజారిటీ వర్గాలకు ఉపయోగపడనందున వాటిని తొలగించాలని రేవంత్ రెడ్డి ఆదేశించడంతో కొత్త రూట్ మ్యాప్ ను ఖరారు చేశారు.

రాయదుర్గం నుంచి శంషాబాద్ విమానాశ్రయానికి వెళ్లే మార్గాలను నిలిపివేశారు. 31 కిలో మీటర్ల పొడవైన ఈ లైన్ కు గతేడాది శంకుస్థాపన చేయగా, దీనికి రూ.6,250 కోట్లు ఖర్చవుతుందని అంచనా వేశారు. పెరిగిన ట్రాఫిక్ రద్దీ దృష్ట్యా విమానాశ్రయ కనెక్టివిటీని నిర్ధారించడానికి, భవిష్యత్ లో ప్రజా రవాణా డిమాండ్ పరిష్కరించేందుకు ప్రత్యామ్నాయ మార్గాలను సిద్ధం చేశారు.

కొత్త ప్రతిపదిత మార్గాలు నగరంలోని 4 మూలల నుంచి విమానాశ్రయాన్ని కలుపుతాయని, హైదరాబాద్ నగరంలోని మెజారిటీ ప్రయాణికులకు మెట్రో రైలు సేవలు అందుబాటులో ఉండేలా చూస్తామని హెచ్ఎంఆర్ఎల్ తెలిపింది.

తక్కువ ఖర్చుతో ఎక్కువ ప్రజా రవాణాను అందించడమే కొత్తగా రూపొందించిన మెట్రో రైలు కనెక్టివిటీ ప్రధాన లక్ష్యం. గత ప్రభుత్వం ప్రతిపాదించిన మెట్రో రైల్ నెట్ వర్క్ కు భారీగా ఖర్చు చేసినా తక్కువ మందికి మాత్రమే ప్రయోజనం చేకూరేది. ప్రస్తుతం హైదరాబాద్ మెట్రో రైలు మియాపూర్ నుంచి ఎల్బీనగర్ వరకు, జేబీఎస్ స్టేషన్ నుంచి ఎంజీబీఎస్ వరకు, నాగోల్ నుంచి రాయదుర్గం వరకు మూడు కారిడార్లలో 69 కిలో మీటర్ల మేర సేవలు అందిస్తోంది. రెండో దశలో సికింద్రాబాద్ జేబీఎస్ నుంచి ఎంజీబీఎస్ వరకు మెట్రో రైలును చాంద్రాయణగుట్ట క్రాస్ రోడ్డు వరకు విస్తరించనున్నారు.

వీటితో పాటు నాలుగు కొత్త కారిడార్లలో మెట్రో రైల్ నెట్ వర్క్ ను నిర్మించనున్నారు. కారిడార్ 2 కింద ఎంజీబీఎస్ మెట్రో స్టేషన్ నుంచి ఫలక్ నుమా (5.5 కిలో మీటర్లు), ఫలక్ నుమా నుంచి చాంద్రాయణగుట్ట క్రాస్ రోడ్డు (1.5 కిలో మీటర్లు) వరకు మెట్రోను విస్తరించనున్నారు. కారిడార్ 4 కింద నాగోల్ మెట్రో స్టేషన్ నుంచి ఎల్బీనగర్ మెట్రో స్టేషన్ వరకు, చాంద్రాయణగుట్ట క్రాస్ రోడ్, మైలార్ దేవ్ పల్లి, పీ7 రోడ్డు నుంచి శంషాబాద్ ఎయిర్ పోర్టు (29 కి.మీ)ను కలుపుతారు. ఇదే కారిడార్ లో మైలార్ దేవ్ పల్లి నుంచి ఆరాంఘర్ (4 కిలో మీటర్లు) మీదుగా రాజేంద్ర నగర్ వద్ద ప్రతిపాదిత హైకోర్టుకు మెట్రో కనెక్టివిటీ కల్పిస్తారు.

కారిడార్ 5 రాయదుర్గం మెట్రో స్టేషన్ నుంచి బయోడైవర్సిటీ జంక్షన్, నానక్ రామ్ గూడ జంక్షన్, విప్రో జంక్షన్, అమెరికన్ కాన్సులేట్ (ఫైనాన్షియల్ డిస్ట్రిక్ట్) (8 కిలో మీటర్లు), కారిడార్ 6 మియాపూర్ మెట్రో స్టేషన్ నుంచి బీహెచ్ ఈఎల్ మీదుగా పటాన్‌చెరు వరకు 14 కిలోమీటర్లు, కారిడార్ 7 ఎల్బీనగర్ మెట్రో స్టేషన్ నుంచి వనస్థలిపురం, హయత్ నగర్ (8 కిలోమీటర్లు) వరకు ఉంటుంది.