Nampally : నాంపల్లి రైల్వేస్టేషన్ సమీపంలో కాల్పులు

Nampally : హైదరాబాద్ లో అర్ధరాత్రి కాల్పులు కలకలం సృష్టించాయి. నాంపల్లి పోలీస్ స్టేషన్ పరిధి నాంపల్లి రైల్వే స్టేషన్ సమీపంలో పోలీసులు నిర్వహించిన డెకాయి ఆపరేషన్ లో ఈ కాల్పులు జరిగాయి. నాంపల్లి పోలీసులు, యాంటీ డెకాయిల్ టీం సంయుక్త ఆధ్వర్యంలో హైదరాబాద్ సీపీ ఆదేశాల మేరకు నాంపల్లి రైల్వే స్టేషన్ వద్ద తనిఖీలు చేపట్టారు. రాత్రి సమయంలో ప్రయాణికులు పడుకున్నప్పుడు వారిపై దాడిచేసి డబ్బులు, సెల్ ఫోన్లు, బంగారు ఆభరణాలు దోచుకుంటున్నట్లు సమాచారంతో నిన్న(గురువారం) అర్ధరాత్రి సమయంలో తనిఖీ చేపట్టారు. ఈ సమయంలో అనుమానాస్పదంగా తిరుగుతున్న ఇద్దరు వ్యక్తులను పోలీసులు ప్రశ్నించారు. మాంగర్ బస్తీకి చెందిన వారిద్దరూ పోలీసులపై గొడ్డలితో దాడికి యత్నించారు.

దీంతో ఆత్మరక్షణకు పోలీసులు కాల్పులు జరిపారు. పోలీసుల ఫైరింగ్ లో తొడకు గాయమైన రాజు (24)ను రాత్రి 1.10 గంటలకు ఉస్మానియా ఆస్పత్రికి తరలించి చికిత్స అందించారు. తొడలో దిగిన బుల్లెట్ ను వైద్యులు ఆపరేషన్ చేసి తొలగించారు. ప్రస్తుతం రాజు ఆరోగ్య పరిస్థితి నిలకడగా ఉందని వైద్యులు తెలిపారు. మరో వ్యక్తి ఆయ్యాన్ ను పోలీసులు అదుపులోకి తీసుకుని విచారిస్తున్నారు.