England Vs Pakistan : టీ-20 వరల్డ్ కప్ వేళ.. ఇంగ్లాండ్ చేతిలో చిత్తుగా ఓడిన పాకిస్థాన్
England Vs Pakistan
England Vs Pakistan : అతి త్వరలో టీ20 వరల్డ్ కప్ ప్రారంభం కానుంది. ఈ సమయంలో పాకిస్థాన్‌కు బిగ్ షాక్ తగిలింది. ఇంగ్లండ్‌తో జరిగిన నాలుగు టీ20ల సిరీస్‌ను ఒక్క మ్యాచ్ కూడా గెలవకుండా పేలవంగా ముగించింది. ఓవల్ వేదికగా జరిగిన ఆఖరి టీ20లో ఏడు వికెట్ల తేడాతో పాక్ చిత్తుగా ఓడిపోయింది. ఈ సిరీస్‌లో పాకిస్థాన్ బ్యాటర్లు పూర్తిగా విఫలమయ్యారు. వర్షం కారణంగా తొలి, మూడవ టీ20 రద్దవ్వగా, మిగిలిన రెండింట్లో పాకిస్థాన్ ఆలౌటైంది. రెండు జట్ల మధ్య నాలుగు టీ20 మ్యాచ్‌ల సిరీస్ జరిగింది. ఇందులో ఇంగ్లండ్ 2-0తో గెలిచింది. సిరీస్‌లోని రెండు మ్యాచ్‌లు వర్షం కారణంగా రద్దు కాగా మిగిలిన రెండింటిలో ఇంగ్లండ్ గెలిచి సిరీస్‌ను కైవసం చేసుకుంది. నాలుగో టీ20లో ఇంగ్లండ్ 7 వికెట్ల తేడాతో పాకిస్థాన్‌ను ఓడించింది.
ఈ సిరీస్‌లోని నాల్గవ మ్యాచ్ లండన్‌లోని కెన్నింగ్టన్ ఓవల్‌లో జరిగింది. ఇందులో ఇంగ్లండ్ టాస్ గెలిచి బౌలింగ్ ఎంచుకుంది. తొలుత బ్యాటింగ్ చేసిన పాకిస్థాన్ 19.5 ఓవర్లలో 157 పరుగులకు ఆలౌటైంది. ఉస్మాన్ ఖాన్ మాత్రమే ఇన్నింగ్స్ ఆడి 21 బంతుల్లో 3 ఫోర్లు, 2 సిక్సర్ల సాయంతో 38 పరుగులు చేశాడు. జట్టులో మొత్తం నలుగురు బ్యాట్స్‌మెన్ పరుగుల ఖాతా కూడా తెరవలేకపోయారు. ఈ సమయంలో ఇంగ్లండ్ తరఫున ఆదిల్‌ రషీద్‌, లియామ్‌ లివింగ్‌స్టోన్‌, మార్క్‌ వుడ్‌ తలో 2 వికెట్లు తీశారు.
అనంతరం 158 పరుగుల లక్ష్యాన్ని ఛేదించిన ఇంగ్లండ్ 15.3 ఓవర్లలో 3 వికెట్లు కోల్పోయి విజయం సాధించింది. పరుగుల వేటలో కెప్టెన్ జోస్ బట్లర్, ఫిలిప్ సాల్ట్ శుభారంభం అందించి తొలి వికెట్‌కు 82 పరుగుల (38 బంతుల్లో) భాగస్వామ్యాన్ని నెలకొల్పారు. 24 బంతుల్లో 6 ఫోర్లు, 2 సిక్సర్ల సాయంతో 45 పరుగులు చేసి సాల్ట్ ఔట్ కావడంతో ఈ భాగస్వామ్యం 7వ ఓవర్ రెండో బంతికి ముగిసింది. ఆ తర్వాత 9వ ఓవర్ చివరి బంతికి కెప్టెన్ బట్లర్ కూడా పెవిలియన్ బాట పట్టగా, అతను 21 బంతుల్లో 7 ఫోర్లు, 1 సిక్స్ సాయంతో 39 పరుగులు చేశాడు.
ఆ తర్వాత జట్టుకు మూడో దెబ్బ తగిలింది. 18 బంతుల్లో 1 ఫోర్, 1 సిక్స్ సాయంతో 20 పరుగులు చేసి 11వ ఓవర్ చివరి బంతికి విల్ జాక్వెస్ రూపంలో ఇంగ్లండ్ మూడో వికెట్ కోల్పోయింది. దీని తర్వాత జానీ బెయిర్‌స్టో, హ్యారీ బ్రూక్ నాలుగో వికెట్‌కు 46* (27 బంతుల్లో) భాగస్వామ్యం నెలకొల్పి జట్టుకు విజయాన్ని అందించారు. బెయిర్‌స్టో 16 బంతుల్లో 1 ఫోర్, 3 సిక్సర్ల సాయంతో 28* పరుగులు చేయగా, బ్రూక్ 14 బంతుల్లో 1 ఫోర్, 1 సిక్స్‌తో 17* పరుగులు చేశాడు.