Rakul Preet Singh : హైదరాబాద్ లో పట్టుబడ్డ డ్రగ్స్.. రకుల్ ప్రీత్ సింగ్ సోదరుడి అరెస్టు

Rakul Preet Singh Brother

Rakul Preet Singh : హైదరాబాద్ లో డ్రగ్స్ పట్టుబడటం మరోసారి కలకలం రేపుతోంది. సైబరాబాద్ పరిధిలో రూ.2 కోట్ల విలువైన డ్రగ్స్ ను పోలీసులు స్వాధీనం చేసుకున్నారు. 200 గ్రాముల కొకైన్ పట్టుబడింది. ఈ వ్యవహారంలో ప్రముఖ టాలీవుడ్ హీరోయిన్ రకుల్ ప్రీత్ సింగ్ సోదరుడు అమన్ ప్రీత్ సింగ్ ను పోలీసులు అరెస్టు చేశారు. అమన్ ప్రీత్ సింగ్ నుంచి పోలీసులు కీలక సమాచారం రాబట్టినట్లు తెలుస్తోంది. ముంభై, గోవా నుంచి భారీగా డ్రగ్స్ తీసుకొచ్చి హైదరాబాద్ లో విక్రయిస్తున్నట్లు పోలీసులు తేల్చారు. ఈ వ్యవహారంలో కొందరు సినీ, వ్యాపార ప్రముఖులను కూడా అరెస్టు చేసినట్లు సమాచారం.

హైదరాబాద్ లో డ్రగ్స్ పట్టుబడుతున్న ప్రతీసారి సినీ రంగానికి చెందినవారి పేర్లు బయటపడుతుండడంతో టాలీవుడ్ కలవరపాటుకు గురవుతోంది. నిందితుల వివరాలను పోలీసులు బయటపెట్టారు. ఒనౌహా బ్లెస్సింగ్ (వెస్ట్ ఆఫ్రికా), అజీజ్ నోహీం, అల్లం సత్య వెంకట గౌతం, సానబోయిన వరుణ్ కుమార్, మహ్మద్ మహబూబ్ షరీఫ్ లను పోలీసులు అరెస్టు చేశారు. ఈ కేసులో మరో ఇద్దరు డ్రగ్ సప్లయర్స్ పరారీలో ఉన్నారు. ఐదుగురు డ్రగ్స్ పెడ్లర్స్ నుంచి 199 గ్రాముల కొకైన్, 2 పాస్ పోర్టులు, 10 మొబైల్ ఫోన్లు, 2 బైకులు స్వాధీనం చేసుకున్నారు.