Devara : ఈ ఏడాది బాక్సాఫీస్ ముందుకు ‘దేవర’ రావాల్సిందే!

Devara

Devara : ఈ సంవత్సరం (2024) ఎలక్షన్ల హడావుడితో సినీ అభిమానులు కొంత నిరాశకు గురయ్యారు. ఫస్ట్ ఆఫ్ అంతా చప్పగానే సాగింది. కానీ సెకండ్ ఆఫ్ మాత్రం పెద్ద పెద్ద సినిమాలు రిలీజ్ కు క్యూ కడుతున్నాయి. ఈ నేపథ్యంలోనే ‘కల్కి’ బయటకు రాగా.. పుష్ప2, గేమ్ ఛేంజర్ తదితర భారీ చిత్రాలు రిలీజ్ కు సిద్ధంగా ఉన్నాయి. ఇక, వీటితో పాటు రాబోతున్న మరో సినిమా కొరటాల శివ – జూనియర్ ఎన్టీఆర్ కాంబోలో తెరకెక్కుతున్న ‘దేవర’ ఉంది.

ఆగస్ట్ 15వ రిలీజ్ అని ప్రకటించిన పుష్ప 2 డిసెంబర్ కు వెళ్లిపోయింది. ఆ నెలలో కూడా కష్టమేనన్న సంకేతాలు కనిపిస్తున్నాయి. దీంతో 2024లో బన్నీ ఎంట్రీ ప్రశ్నార్ధకంగానే మారింది. వీటికి తోడు 2024 ఎన్నికల్లో ఏపీలో బన్నీ వ్యవహారతీరుపై పవన్ అభిమానులు గుర్రుగా ఉన్నారు.

టాలీవుడ్ ఫోర్ పిల్లర్లు చిరంజీవి, బాలకృష్ణ, నాగార్జున, వెంకటేష్ కూడా ఈ సంవత్సరం వెండితెరపై కనిపించేలా లేరు. వచ్చే ఏడాది సంక్రాంతికో లేదంటే సమ్మర్ కో ముహుర్తాలు ఫిక్స్ చేసుకున్నాయి. ఈ ఏడాదిలో వెంకీ, నాగ్ ఎంట్రీ ఇచ్చారు కానీ, ఆదరణ మాత్రం చూరగొనలేకపోయారు.

ప్రస్తుతం ఏపీ డిప్యూటీ సీఎంగా కొనసాగుతున్న పవర్ స్టార్ పవన్ కళ్యాణ్ సినిమాల రిలీజ్ డేట్స్ గురించి ఇప్పట్లో మాట్లాడడం ఏమంత సముచితం కాదేమో. ఆయన ఇప్పటికే తన షెడ్యూల్ ను నిర్మాతలు, డైరెక్టర్లకు కూడా పంపించారట.

ఇక రాజమౌళి సినిమాకు కమిట్ అయిన మహేష్ బాబు గురించి ఐదేళ్లు మర్చిపోవాల్సిందే ఈ ఏడాది ఉగాదిన మహేష్ బాబు సినిమా గురించి రాజమౌళి ప్రెస్ మీట్ పెట్టబోతున్నారన్న అన్న వార్త వినిపిస్తుంది. మధ్యలో వచ్చే మహేష్ బాబు పుట్టినరోజు ఆగరస్టు 9న కూడా ఎలాంటి న్యూస్ ఉండబోదన్న సమాచారం ఉంది. దీంతో సూపర్ స్టార్ ఫ్యాన్స్ ‘మురారి’ని రీ రిలీజ్ చేసుకొని సంతృప్తి పడుతున్నారు.

‘రెబల్ స్టార్’ ‘కల్కి’తో ప్రపంచాన్ని చుట్టేస్తున్నారు. పెద్ద హీరోల్లో భారీ ప్రాజెక్టులను చేతిలో పెట్టుకొని నిరంతరం షూటింగ్స్ చేస్తున్న ఏకైక హీరో ప్రభాస్. లైన్ లో ‘రాజాసాబ్, కల్కి 2, సలార్ 2, స్పిరిట్’ ఉన్నాయి. ప్రాజెక్టులు కూడా ఫ్యాన్స్ ను ఎంగేజ్ చేసేలా ఉన్నాయి.

దసరాకు ‘దేవర’ అంటూ కొరటాల ఇచ్చిన ప్రకటన నిలబెట్టుకునే పనిలో ఆయనతో పాటు హీరో ఉన్నారు. ఇప్పటికే రిలీజైన ‘దేవర ముందు నువ్వెంత’ అనే సాంగ్ సెన్సేషన్ అయ్యింది. షూటింగ్ తుది దశకు చేరుకుంది. దీంతో ‘దేవర’ కోసం తెలుగు సినీ అభిమానులు గట్టి నమ్మకం పెట్టుకున్నారు.

మరో హీరో రామ్ చరణ్ కూడా ‘గేమ్ ఛేంజర్’ రిలీజ్ ను సిద్ధం చేస్తున్నారు కానీ.. మూవీ పూర్తిగా డైరెక్టర్ శంకర్ చేతిలో ఉండడంతో, మెగా అభిమానులు ‘మాకు నమ్మకం లేదు దొర’ అనే పరిస్థితి నెలకొంది. దీనికి తోడు ఇటీవల రిలీజైన శంకర్ ‘భారతీయుడు 2’ పూర్తిగా నిరాశపరచడంతో, దర్శకుడు శంకర్ ‘గేమ్ ఛేంజర్’పై జాగ్రత్త వహించాల్సిన పరిస్థితి నెలకొంది. ఈ ఏడాది (2024) టాలీవుడ్ కు కొత్త ఊపు రావాలంటే బాక్సాఫీస్ ముందుకు ‘దేవర’ రావాల్సిందే.