Delhi air quality : ఢిల్లీలో దారుణంగా పడిపోయిన గాలి నాణ్యత

Delhi air quality

Delhi air quality : సగటు 24 గంటల ఎయిర్ క్వాలిటీ ఇండెక్స్ (AQI) ఆదివారం రాత్రి 7 గంటలకు 457కి చేరడంతో ఢిల్లీ గాలిలో నాణ్యత మరింత పడిపోయింది.  ఈ సీజన్‌లో తొలిసారిగా న్యూ ఢిల్లీ, పరిసర ప్రాంతాల్లో గాలి నాణ్యత తీవ్రంగా పడిపోయింది. బుధవారం తర్వాత ఏక్యూఐ ఇంత పెద్ద మార్పును పొందింది. ఢిల్లీలోని అన్ని స్టేషన్లు బవానా (490), అశోక్ విహార్ (487), వజీర్‌పూర్ (483) రాత్రి 7 గంటల సమయానికి అత్యంత కలుషితమైనవిగా 400 కంటే ఎక్కువ ఏక్యూఐని నమోదు చేశాయి.

ఐఎండీ నివేదిక ప్రకారం.. ఆదివారం రాత్రి దేశ రాజధానిలో మోస్తరు నుంచి దట్టమైన పొగమంచు కమ్ముకుంటుంది. సోమవారం ఉదయం దట్టమైన నుంచి మరింత దట్టమైన పొగమంచు అలుముకునే అవకాశం ఉందిని ఐఎండీ స్పష్టం చేసింది. ఈ సమస్య నుంచి గట్టెక్కేందుకు  కమిషన్ ఫర్ ఎయిర్ క్వాలిటీ మేనేజ్‌మెంట్ (సీఏక్యూఎం) శుక్రవారం నుంచి గ్రేడెడ్ రెస్పాన్స్ యాక్షన్ ప్లాన్ (GRAP) దశ IIIని అమలు చేసింది.

జీఆర్ఏపీ-3 అమల్లో ఉండగా, నిర్మాణం, కూల్చివేతలను నిలిపివేశారు. మైనింగ్ కు సంబంధించి అన్ని కార్యకలాపాలు నిలిపివేయబడతాయి, నాన్-ఎలక్ట్రిక్, నాన్-CNG, నాన్-BS-VI డీజిల్ అంతర్రాష్ట్ర బస్సులను పరిమితం చేశారు. పాఠశాలలు మూసివేశారు. శుక్రవారం నుంచి ఢిల్లీ రవాణా శాఖ కాలుష్య నిబంధనలను ఉల్లంఘించే వాహనాలపై కఠినమైన జరిమానాలు విధిస్తోంది.

1. BS-III పెట్రోల్, BS-IV డీజిల్ లైట్ మోటారు వాహనాలు (LMVలు): ఈ కేటగిరీల పరిధిలోకి వచ్చే పాత కార్లు, ఫోర్ వీలర్ ఢిల్లీలో నడపద్దు.
2. BS-III డీజిల్ మీడియం గూడ్స్ వెహికల్స్: ఢిల్లీలో రిజిస్టర్ చేయబడిన వాహనాలు అవసరమైన వస్తువులు లేదా సేవలను రవాణా చేయకపోతే నిషేధించబడ్డాయి.
3. డీజిల్ లైట్ కమర్షియల్ వెహికల్స్ (LCVలు) ఢిల్లీ వెలుపల నుంచి BS-III ప్రమాణాలు లేదా అంతకంటే తక్కువ ఉన్న LCVలు అవసరమైన వస్తువులను తీసుకువెళ్లే వరకు ఢిల్లీలోకి ప్రవేశించలేవు.
4. NCR రాష్ట్రాల నుంచి అంతర్రాష్ట్ర బస్సులు: ఎలక్ట్రిక్, CNG లేదా BS-VI డీజిల్ బస్సులు మాత్రమే ఢిల్లీలోకి ప్రవేశించడానికి అనుమతించబడతాయి. అయితే ఆల్ ఇండియా టూరిస్ట్ పర్మిట్లు ఉన్న వాటికి మినహాయింపు ఉంటుంది.

ఇంకా, CAQM రోడ్ల మెకనైజ్డ్ స్వీపింగ్‌ను పెంచాలని ఆదేశించింది. హాట్‌స్పాట్ ప్రాంతాల్లో ముఖ్యంగా ట్రాఫిక్ రద్దీ సమయానికి ముందు రోడ్లపై నీటిని చల్లడం పెంచాలని కోరింది. ఢిల్లీ నివాసితులను కార్‌పూల్ చేయాలని, వీలైనంత ఎక్కువగా ప్రజా రవాణాను ఉపయోగించాలని ప్రభుత్వం కోరింది.

GRAP స్టేజ్ III అమలు తర్వాత శుక్రవారం నుంచి ఢిల్లీ మెట్రో అదనంగా 20 ట్రిప్పులను ప్రారంభించింది. 60 అదనపు ట్రిప్పులు GRAP-III స్థానంలో ఉండే వరకు వారం రోజుల్లో ఢిల్లీ మెట్రో నిర్వహిస్తుంది.