Tirumala : తిరుమలలో భక్తుల రద్దీ.. శ్రీవారి దర్శనానికి 15 గంటల సమయం

Tirumala

Tirumala News : కలియుగ వైకుంఠం తిరుమలలో భక్తుల రద్దీ కొనసాగుతోంది. శ్రీవారి దర్శనానికి భక్తులు భారీగా తరలి వస్తున్నారు. వెంకటేశ్వర స్వామి దర్శనానికి 15 గంటల సమయం పడుతుందని టీటీడీ అధికారులు తెలిపారు. భక్తులతో వైకుంఠం క్యూ కాంప్లెక్స్ లన్నీ నిండిపోయాయి. నారాయణగిరి షెడ్ల వరకు భక్తులు దర్శనం కోసం వేచి ఉన్నారు. భక్తులకు ఎలాంటి ఇబ్బంది కలుగకుండా టీటీడీ చర్యలు తీసుకుంటుంది. భక్తులకు నీరు, ఆహారం అందిస్తోంది.

స్వామివారిని శుక్రవారం 72,294 మంది భక్తులు దర్శించుకున్నారు. అందులో 31 వేలకు పైగగా భక్తులు తలనీలాలు సమర్పించుకున్నారు. నిన్న స్వామి వారి హుండీ ఆదాయం రూ.3.39 కోట్లు వచ్చినట్లు అధికారులు తెలిపారు. ఈరోజు (జూన్ 22) పలు సేవలు రద్దు చేస్తూ తిరుమల తిరుపతి దేవస్థానం ప్రకటించింది. తిరుమల శ్రీవారి ఆలయంలో మలయప్పస్వామికి ఏటా జ్యేష్ఠ మాసంలో జ్యేష్ఠ నక్షత్రానికి ముగిసేలా మూడు రోజుల పాటు జ్యేష్ఠాభిషేకాలు నిర్వహిస్తున్నారు. జూన్ 19 నుంచి జూన్ 22 వరకు మూడు రోజుల పాటు ఈ అభిషేకాలు జరుగుతున్నాయి. ఈ క్రమంలో పలు సేవలు రద్దు చేస్తున్నట్లు టీటీడీ అధికారులు తెలిపారు.