AICC Leaders:తెలంగాణ ముఖ్య‌మంత్రి రేవంత్‌రెడ్డి ప్ర‌మాణ స్వీకార మ‌హోత్స‌వంలో పాల్గొనేందుకు హైద‌రాబాద్ వ‌చ్చిన ఏఐసీసీ నేత‌లు సోనియా గాంధీ, రాహుల్ గాంధీ, ప్రియాంకా గాంధీల కాన్వాయ్ తాజ్ కృష్ణ హోట‌ల్‌కు చేరుకుంది. ఈ సంద‌ర్భంగా ముగ్గురు అగ్ర‌నేత‌లకు కాంగ్రెస్ నేత‌లు పుష్ప‌గుచ్చ‌మిచ్చి స్వాగ‌తం ప‌లికారు. సోనియా గాంధీకి కాంగ్రెస్ సీనియ‌ర్ నేత వి. హ‌నుమంత‌రావు స్వాగ‌తం ప‌లికారు. ఈ సంద‌ర్భంగా వీహెచ్ యోగ‌క్షేమాల‌ను సోనియా, రాహుల్ గాంధీలు అడిగి తెలుసుకున్నారు.
అంత‌కు ముందు శంషాబాద్ విమ‌నాశ్ర‌యంలో సోనియా, రాహుల్, ప్రియాంక‌ల‌కు రేవంత్‌రెడ్డి, తెలంగాణ ఇన్‌చార్జ్ మాణిక్‌రావ్ ఠాక్రే, దుద్దిళ్ల శ్రీ‌ధ‌ర్‌బాబు ఘ‌న స్వాగ‌తం ప‌లికారు. భారీ భ‌ద్ర‌త న‌డుమ కాన్వాయ్‌లో శంషాబాద్ ఏయిర్ పోర్ట్ నుంచి నేరుగా తాజ్‌కృష్ణ హోట‌ల్‌కు ఏఐసీసీ నేత‌లు చేరుకున్నారు. కాంగ్రెస్ అగ్ర‌నేత‌ల రాక సంద‌ర్భంగా ఎయిర్ పోర్ట్ వ‌ద్ద పోలీసులు భారీ బందోబ‌స్తు ఏర్పాటు చేశారు. ఈ రోజు మ‌ధ్యాహ్నం 1:04 గంట‌ల‌కు తెలంగాణ ముఖ్య‌మంత్రిగా రేవంత్ రెడ్డి ప్ర‌మాణ స్వీకారం చేయ‌నున్న విష‌యం తెలిసిందే. ఎల్బీ స్టేడియంలో జ‌ర‌గ‌నున్న ఈ కార్య‌క్ర‌మంలో రేవంత్‌రెడ్డితో పాటు ప‌లువురు మంత్రులుగా ప్ర‌మాణ స్వీక‌రాం చేయ‌నున్నారు.