KTR : కాంగ్రెస్ అరచేతిలో వైకుంఠం చూపించి అధికారంలోకి వచ్చింది: కేటీఆర్

KTR

KTR : కాంగ్రెస్ పార్టీ అరచేతిలో వైకుంఠం చూపించి రాష్ట్రంలో అధికారంలోకి వచ్చిందని బీఆర్ఎస్ కార్యనిర్వాహక అధ్యక్షుడు కేటీఆర్ అన్నారు. భద్రాద్రి కొత్తగూడెం జిల్లా ఇల్లందులో నిర్వహించిన పట్టభద్రుల ఎమ్మెల్సీ ఎన్నికల ప్రచారంలో ఆయన మాట్లాడారు. ఆరు గ్యారంటీల పేరుతో కాంగ్రెస్ మోసం చేసిందన్నారు. కాంగ్రెస్ ప్రభుత్వ పాలన గురించి ఆరు నెలల్లోనే ప్రజలకు అర్థమైందని చెప్పారు.

బీఆర్ఎస్ హయాంలో 2 లక్షల ప్రభుత్వ ఉద్యోగాలు భర్తీ చేసినట్లు చెప్పారు. ప్రైవేటు రంగంలో 24 లక్షల ఉద్యోగాల కల్పనకు కృషి చేసినట్లు వివరించారు. గత పదేళ్లలో ఏ రాష్ట్రం కూడా ఇంత పెద్ద సంఖ్యలో ఉద్యోగాలు ఇవ్వలేదన్నారు. అయితే, తాము ఉద్యోగాల కల్పనపై సరిగా ప్రచారం చేసుకోలేదని అన్నారు. గత 65 ఏళ్లో రాష్ట్రానికి వచ్చిన వైద్య కళాశాలలు 3 మాత్రమేనని, తాము పదేళ్లలో 33 వైద్య కళాశాలలు ఏర్పాటు చేశామని వెల్లడించారు. వ్యవసాయ ఉత్పత్తుల్లో తెలంగాణ రాష్ట్రాన్ని అగ్ర స్థానానికి తీసుకెళ్లినట్లు కేటీఆర్ తెలిపారు.