Condom Politics : ఏపీలో ‘కండోమ్’ రాజకీయాలు..ఇలాంటి ఐడియాలు వీళ్లకే వస్తాయి కాబోలు!

Condom Politics in AP

Condom Politics in AP : ఏపీ రాజకీయాలు వికృత రూపం తీసుకుంటున్నాయి. ప్రత్యర్థులను దెబ్బతీయడానికి నానా రకాలుగా ప్రయత్నాలు జరుగుతున్నాయి. ప్రత్యర్థి పార్టీల నేతలను, నాయకుల పరువుకు భంగం కలిగించే విధంగా సోషల్ మీడియాలో ట్రోలింగ్ కామన్ అయిపోయింది. ఇక ప్రసంగాల్లో బూతులు తప్పక ఉండాల్సిందే. ఎన్నికలు దగ్గర పడుతున్న కొద్ది వీరి చేష్టలు మరింత నిసిగ్గుగా మారిపోతున్నాయి. ఒకరి పథకాలపై ఒకరు దుమ్మెత్తి పోసుకుంటున్నారు. ప్రత్యర్థి పార్టీలను, నేతలను ఏ రకంగా ఇబ్బంది పెట్టాలో ఆ విధంగా కొత్త కొత్త ఐడియాలతో ముందుకొస్తున్నారు.

ప్రస్తుతం ఏపీ రాజకీయాల్లో ‘కండోమ్’ చుట్టు వింత ప్రచారం జరుగుతోంది. ఇది ముందుగా ఎవరు ప్రారంభించారో తెలియదు కానీ టీడీపీపై వైసీపీ, వైసీపీపై టీడీపీ కండోమ్ ప్రచార వీడియోలు తెగ వైరల్ అవుతున్నాయి. వైసీపీ అమలు చేస్తున్న అమ్మఒడి పథకానికి ప్రత్యామ్నాయంగా టీడీపీ ఓ పథకాన్ని అమలు చేస్తామని చెబుతోంది. దానికి కౌంటర్ గా వైసీపీ వాళ్లు ఓ కండోమ్ ప్యాకెట్ పై ‘భవిష్యత్తు కు గ్యారెంటీ’ అని ముద్రించి దాన్ని ప్రచారం చేస్తున్నారు.

ఆ పథకం తక్కువ మందికి వర్తించేందుకే, జనాభాను తగ్గించడానికి సదరు కండోమ్ ప్యాకెట్లు పంచుతున్నట్లు ఆ వీడియోలోని మనుషులతో చెప్పించారు. ఈ వీడియో టీడీపీ పథకాలకు వ్యతిరేకంగా కండోమ్ ప్యాకెట్ వీడియోను వైసీపీ వాళ్లు ప్రచారం చేస్తున్నారు. ఇక టీడీపీ వాళ్లు ‘సిద్ధం’ పేరుతో ఓ కండోమ్ ప్యాకెట్ ను తయారు చేసి దానికి జగన్ వాయిస్ ఓవర్ పెట్టి ఆ వీడియోను తెగ షేర్ చేస్తున్నారు.

రెండు పార్టీలు చేస్తున్న కండోమ్ ప్రచారాన్ని చూసి జనాలు నవ్వుకుంటున్నారు. ప్రచారంలో కండోమ్ ప్యాకెట్లను సైతం వదలడం లేదని విస్తుపోతున్నారు. ఇది మున్ముందు ఈ ప్రచారం ఇంకెంత వెర్రితలలు వేస్తుందో చూడాలి అంటున్నారు.