AP Mega DSC2024 : మారిన మెగా డిఎస్సీ షెడ్యూల్.. నవంబర్ మొదటి వారంలో నోటిఫికేషన్  

AP Mega DSC2024 : ఆంధ్రప్రదేశ్ మెగా డీఎస్సీ నోటిఫికేషన్ విడుదలలో కాస్త జాప్యం జరిగే అవకాశం ఉంది. టెట్ పరీక్షలు ఇప్పటికే పూర్తయినందున, టెట్ 2024 ఫలితాలు నవంబర్ రెండవ తేదీన ప్రకటించబడతాయి. టెట్ ఫలితాలు వెలువడిన వెంటనే డీఎస్సీ నోటిఫికేషన్ వస్తుందని విద్యాశాఖ వర్గాలు తొలుత ప్రకటించాయి. ఈ తేదీల్లో మార్పు ఉండొచ్చని అంటున్నారు. విద్యాశాఖ మంత్రి నారా లోకేష్ విదేశీ పర్యటనతోపాటు సాంకేతిక కారణాలతో నోటిఫికేషన్ విడుదలలో స్వల్ప మార్పులు చోటుచేసుకునే అవకాశం ఉందని చెబుతున్నారు.

నవంబర్ మొదటి వారంలోనే మెగా డీఎస్సీ నోటిఫికేషన్ విడుదల చేసేందుకు పాఠశాల విద్యాశాఖ ఏర్పాట్లు చేస్తోంది. తొలుత 3వ తేదీన నోటిఫికేషన్ విడుదల చేయాలని భావించారు. ఆదివారం కావడంతో ముఖ్యమైన నేతలు అందుబాటులో ఉంటారో లేదోనన్న అనుమానంతో మరో తేదీన నోటిఫికేషన్ వెలువడుతుందని విద్యాశాఖ వర్గాలు చెబుతున్నాయి. 16,347 పోస్టులతో మెగా డీఎస్సీ నోటిఫికేషన్ విడుదల కానుంది.

మరోవైపు నోటిఫికేషన్ వెలువడిన తర్వాత న్యాయపరమైన వివాదాలు తలెత్తే అవకాశం ఉందని భావించిన ప్రభుత్వం.. విద్యాశాఖను జాగ్రత్తలు తీసుకోవాలని ఆదేశించింది. అధికారంలోకి వచ్చిన వెంటనే డిసెంబర్ లోగా ఖాళీలను భర్తీ చేస్తామని ప్రభుత్వం ప్రకటించినా టెట్ నిర్వహించడంతో పరీక్షలు, నోటిఫికేషన్ ఆలస్యమైంది. రాష్ట్ర ప్రభుత్వం ప్రతిష్టాత్మకంగా నిర్వహిస్తున్న మెగా డీఎస్పీని ఎలాంటి న్యాయ వివాదాలు లేకుండా చేపట్టాలని మంత్రి నారా లోకేష్ ఇప్పటికే అధికారులను ఆదేశించారు. డీఎస్సీ 2024 సిలబస్‌కు సంబంధించి సోషల్ మీడియాలో జరుగుతున్న ప్రచారాన్ని ప్రభుత్వం ఇప్పటికే తిరస్కరించింది. సిలబస్ వివరాలను https://aptet.apcfss.inలో అందుబాటులో ఉంచామని స్పష్టం చేశారు.