Chandrababu:త‌లైవాకు చంద్ర‌బాబు జ‌న్మ‌దిన శుభాకాంక్ష‌లు
Chandrababu:సూప‌ర్ స్టార్ ర‌జినీకాంత్ పుట్టిన రోజు నేడు. వెండితెర‌పై త‌న‌దైన మార్కు మేన‌రిజ‌మ్స్‌, స్టైల్స్‌తో కోట్లాది హృద‌యాల్ని గెలుచుకుని తిరుగులేని సూప‌ర్ స్టార్ అనిపించుకుంటున్నారు. గ‌త కొంత కాలంగా త‌న మార్కు బ్లాక్ బ‌స్ట‌ర్‌ని అందించ‌ని ర‌జినీకాంత్ తాజాగా `జైల‌ర్` సినిమాతో ఆలోటుని తీర్చి అభిమానుల‌ని ఖుషీ చేశారు. ఈ ఏడాది ఆగ‌స్టు 10న విడుద‌లైన ఈ సినిమా అనూహ్య విజ‌యాన్ని సాధించి బాక్సాఫీస్ వ‌ద్ద సంచ‌ల‌నం సృష్టించింది.
నెల్స‌న్ దిలీప్‌కుమార్ ద‌ర్శ‌క‌త్వంలో స‌న్ పిక్చ‌ర్స్ బ్యాన‌ర్‌పై క‌ళానిధి మార‌న్ అత్యంత భారీ స్థాయిలో ఈ మూవీని నిర్మించారు. ట్రైల‌ర్‌తో అంచ‌నాల్ని పెంచేసిన ఈ సినిమా వ‌ర‌ల్డ్ వైడ్‌గా విడుద‌లై కాసుల వ‌ర్షం కురిపించింది. ర‌జినీ కెరీర్‌లోనే అత్య‌ధికంగా రూ.650 కోట్లు రాబ‌ట్టిన మ‌రో సినిమాగా నిలిచి అభిమానుల్ని స‌ర్ ప్రైజ్ చేసింది. ఈ సినిమా విజ‌యం త‌రువాత ర‌జ‌నీ జ‌రుపుకుంటున్న బ‌ర్త్‌డే కావ‌డంతో ఈ పుట్టిన రోజుకు ప్ర‌త్యేక‌త ఏర్ప‌డింది.
మంగ‌ళ‌వారం త‌లైవా పుట్టిన రోజు సంద‌ర్భంగా ఆయ‌న అభిమానులు, సినీ ల‌వ‌ర్స్‌, సెల‌బ్రిటీలు, ప్ర‌ముఖ రాజ‌కీయ నేత‌లు ఆయ‌న‌కు పుట్టిన రోజు శుభాకాంక్ష‌లు తెలియ‌జేస్తున్నారు. దీంతో నెట్టింట త‌లైవాపై ట్వీట్‌ల వ‌ర్షం కురుస్తోంది. ఈ నేప‌థ్యంలో టీడీపీ జాతీయ అధ్య‌క్షులు, మాజీ ముఖ్య‌మంత్రి నారా చంద్ర‌బాబు నాయుడు సూప‌ర్ స్టార్ ర‌జినీకాంత్‌కు ట్విట్ట‌ర్ వేదిక‌గా పుట్టిన రోజు శుభాకాంక్ష‌లు తెలియ‌జేశారు.
`నా స్నేహితుడు ర‌జినీకాంత్ విజ‌యాల ప‌రంప‌ర కొన‌సాగాలి. ఆయురారోగ్యాల‌తో ర‌జినీకాంత్ జీవితం ఆనందంగా సాగాలి` అంటూ చంద్ర‌బాబు నాయుడు ట్వీట్ చేశారు. ఈ సంద‌ర్భంగా ర‌జినీతో క‌లిసి దిగిన ఓ ఫొటోని షేర్ చేశారు. ఈ రోజు ర‌జినీకాంత్ 73 ఏళ్ల వ‌య‌సులోకి అడుగుపెడుతున్నారు. ఈ నేప‌థ్యంలో ఆయ‌న‌పై సోష‌ల్ మీడియా వేదిక‌గా పుట్టిన రోజు శుభాకాంక్ష‌ల వ‌ర్షం కురుస్తోంది.