Chandrababu : ఏపీ ముఖ్యంత్రిగా చంద్రబాబు ప్రమాణ స్వీకారం

AP CM Chandrababu : ఈరోజు ఉదయం టీడీపీ అధినేత నారా చంద్రబాబు నాయుడు ముఖ్యమంత్రిగా ప్రమాణ స్వీకారం చేశారు. ఈ కార్యక్రమానికి విచ్చేసిన పీఎం నరేంద్ర మోదీ, అమిత్ షా, జేపీ నడ్డా, కిషన్ రెడ్డి, నితిన్ గడ్కరీ, మందకృష్ణ మాదిగ, రజనీకాంత్ దంపతులు, చిరంజీవి, బాలకృష్ణ, వెంకయ్యనాయుడు, మహారాష్ట్ర సీఎం ఏక్ నాథ్ షిండే, పన్నీర్ సెల్వం, ఎన్ వీ రమణ, ప్రఫుల్ పటేల్, చిరాగ్ పాశ్వాన్  తదితర ప్రముఖులు ప్రధాన వేదికపై ఆశీనులయ్యారు. ఆహూతులందరి సమక్షంలో గవర్నర్ చంద్రబాబుతో ప్రమాణం చేయించారు.

‘‘నారా చంద్రబాబు నాయుడు అనే నేను శాసనం ద్వారా నిర్మితమైన భారత రాజ్యాంగం పట్ల నిజమైన విశ్వాసం, విధేయత చూపుతానని, భారత దేశ సార్వభౌమాధికారాన్ని సమగ్రతను కాపాడతానని, ఆంధ్రప్రదేశ్ ముఖ్యమంత్రిగా నా కర్తవ్యాలను శ్రద్ధతో, అంతఃకరణ శుద్ధితో నిర్వహిస్తానని, భయం గాని, పక్షపాతం గాని, రాగద్వేషాలు గాని లేకుండా రాజ్యాంగాన్ని, శాసనాలను అనుసరించి ప్రజలందరకు న్యాయం చేకూరుస్తానని దైవసాక్షిగా ప్రమాణం చేస్తున్నాను’’

‘‘నారా చంద్రబాబు నాయుడు అనే నేను ఆంధ్రప్రదేశ్ రాష్ట్ర ముఖ్యమంత్రిగా నా పరిశీలనకు వచ్చిన లేదా నాకు తెలియవచ్చిన ఏ విషయాన్ని, నా కర్తవ్యాలను సక్రమంగా నిర్వహించేందుకు అవసరమైన మేరకు తప్ప, ప్రత్యక్షంగా గాని, పరోక్షంగా గాని ఏ వ్యక్తికి లేదా వ్యక్తులకు తెలియపరచనని లేదా వెల్లడించనని దైవసాక్షిగా ప్రమాణం చేస్తున్నాను’’ అని ప్రమాణం చేశారు. ఈ సందర్భంగా ఎన్డీయే కూటమి శ్రేణులు, అభిమానులు, ప్రజలు జయ జయ ధ్వానాలతో ఆ ప్రాంతం దద్దరిల్లింది.

ప్రమాణం చేసిన తర్వాత సీఎం చంద్రబాబు పీఎం మోదీ వద్దకు  వెళ్లగా పీఎం పుష్పగుచ్చం అందించి ఆలింగనం చేసుకున్నారు. అనంతరం అక్కడ ఉన్న వారందరికీ చంద్రబాబు నమస్కరించారు.