Modi Priority : చంద్రబాబు, పవన్ లకు మోడీ ప్రాధాన్యత

Modi Priority : దేశానికి ప్రధానిగా.. ప్రపంచంలోనే బలమైన శక్తిగా ఎదిగిన నరేంద్రమోడీ మన తెలుగు నేతలకు ఎంతో గౌరవం ఇచ్చారు. నిన్న మోడీ వారణాసిలో ఎంపీగా నామినేషన్ వేసే కార్యక్రమానికి చంద్రబాబు, పవన్ లను ప్రత్యేకంగా ఆహ్వానించారు. ఈ ఇద్దరు నేతలు వెళ్లగా వారిని తనతోపాటు తీసుకెళ్లి.. వారి సన్మానం అందుకొని ఆప్యాయంగా మాట్లాడి మోడీ ఫిదా చేశారు. ఏపీలో కూటమిగా వెళ్లిన ఈ ఇద్దరు నేతలకు మోడీ ఇచ్చిన గౌరవంపై టీడీపీ, జనసేన నేతల్లో అత్యంత జోష్ నెలకొంది.

భారత ప్రధాని నరేంద్ర మోదీ వరుసగా మూడోసారి వారణాసిలో మంగళవారం నామినేషన్ వేశారు. ఈ కార్యక్రమంలో ఎన్డీయే కూటమి భాగస్వాములు టీడీపీ అధినేత చంద్రబాబు, జనసేనాని పవన్ కళ్యాణ్ పాల్గొన్నారు. ఈ సందర్భంగా మోదీ ఏపీలో సోమవారం జరిగిన పోలింగ్ సరళిపై చంద్రబాబు, పవన్ కళ్యాణ్ లతో మాట్లాడారు. విజయాన్ని ఆకాంక్షిస్తూ వారిద్దరిని పీఎం మోదీ అభినందించారు. ఈ సందర్భంగా చంద్రబాబు, పవన్ లు కూడా మోదీకి శుభాకాంక్షలు తెలిపారు.

పీఎం మోదీ నామినేషన్ కార్యక్రమంలో చంద్రబాబు, పవన్ కళ్యాణ్ లతో పాటు యూపీ సీఎం యోగి ఆదిత్యనాథ్, బీహార్ ముఖ్యమంత్రి నితీశ్ కుమార్, పుష్కర్ ధామి (యూపీ), మోహన్ యాదవ్ (మధ్యప్రదేశ్), విష్ణుదేవ్ సాయ్ (ఛత్తీస్ గఢ్), ఏక్ నాథ్ షిండే (మహారాష్ట్ర), భజన్ లాల్ శర్మ (రాజస్థాన్), హిమంత బిశ్వ శర్మ (అస్సాం), నయాబ్ సైనీ (హర్యానా), ప్రమోద్ సావంత్ (గోవా), ప్రేమ్ సింగ్ తమంగ్ (సిక్కిం), మాణిక్ సాహా (త్రిపుర), ఎన్డీయే పక్షాల నేతలు, కేంద్రద మంత్రులు పాల్గొన్నారు.