Diwali bomb : దీపావళి బాంబ్ పై కూర్చుంటానని ఛాలెంజ్.. పేలడంతో వ్యక్తి మృతి.. వైరల్ వీడియో..

Diwali bomb : ఎందులో పోటీ పడాలి..? ఎందుకు పోటీ పడాలన్న విషయాలను ఇప్పటి యూత్ కు తెలియకపోవడం గమనార్హం. ఏం చేస్తున్నాం.. ఎందుకు చేస్తున్నామన్న విషయాలను అస్సలు పట్టించుకోవడం లేదు. ఒక వ్యక్తిని చావు అంచుల వరకు తీసుకెళ్లి  వినోదం చేసుకుంటున్నారు. ఇటీవల జరిగిన ఘటనే ఇందుకు నిదర్శనం. స్నేహితులతో ఛాలెంజ్ కు దిగిన ఒక వ్యక్తి ప్రాణాలు కోల్పోయాడు. దీనికి సంబంధించిన వీడియో ఇప్పుడు సోషల్ మీడియాలో వైరల్ గా మారింది.

దిగ్భ్రాంతికరమైన ఈ ఘటనలో, దక్షిణ బెంగళూరులోని కోననకుంటెలో జరిగింది. దీపావళి బాంబు కింద వెలిగించి పైన ప్లాస్టిక్ పెట్టె పెట్టి దానిపై కూర్చుంటే ఆటో కొనిస్తామని స్నేహితులు పందెం కాశారు. ఆటో వస్తుంది.. ఎంతో కొంత ఉపాధి దొరుకుతుందని ఒక వ్యక్తి ఈ ఛాలెంజ్ ను స్వీకరించాడు. అది కాస్తా పేలడంలో పాపం అక్కడికక్కడే చనిపోయాడు. ఆటో వస్తుందనుకున్న ఆయన ఆశ ప్రాణాలు తీసింది.

అసలు విషయంలోకి వెళ్తే.. నవంబర్ 4వ తేదీ దీపావళి బాంబుపై కూర్చుంటే ఆటో రిక్షా కొనిస్తామని ఫ్రెండ్స్ అందరూ కలిసి ఛాలెంజ్ పెట్టుకున్నారు. శబరీష్ అనే 32 ఏళ్ల వ్యక్తి ఈ ఛాలెంజ్ ను తాను ఆక్సెప్ట్ చేస్తానని ముందుకు వచ్చాడు. అతను ఛాలెంజ్‌ని విజయవంతంగా పూర్తి చేస్తే ఆటోరిక్షా వస్తుంది కదా అనుకున్నాడు. అందరూ కలిసి ఒక డబ్బా లాంటి దాన్ని తీసుకువచ్చి శబరీష్ ను పైన కూర్చొబెట్టి డబ్బా కింద బాంబు పెట్టారు. కాసేపటికి ఆ డబ్బా కింద ఉన్న బాంబు పేలింది. బాంబు దాటికి డబ్బా మొత్తం  పగిలిపోయింది. దానిపై కూర్చున్న శబరీష్ కొంచెం పైకి లేచి అక్కడే కూర్చుండిపోయాడు. పందెం గెలిచాడని తన ఫ్రెండ్స్ అందరూ దగ్గరికి వచ్చి చూడగా.. మెల్లగా కిందికి వాలాడు. స్థానికులు గమనించి అంబులెన్స్ కు సమాచారం అందించారు. అంబులెన్స్ వచ్చే వరకే శబరీష్ ప్రాణాలు పోయాయి.

#Karnataka #Bengaluru: 32-yr-old Shabarish died after a box of #firecrackers burst under his butt in Konanakunte, South Bengaluru. His friends had promised to buy him an autorickshaw if he won the challenge of sitting on a box of bursting crackers. pic.twitter.com/kktwjYsJf5

— Siraj Noorani (@sirajnoorani) November 4, 2024