Viral Video : కొత్తపేటలో గంజాయి బ్యాచ్ వీరంగం..కఠినంగా శిక్షించాలంటున్న జనాలు

Ganja Batch Attack in Kothapet Viral Video

Viral Video : గంజాయి మత్తులో యువత చిత్తయిపోతోంది. ఇంటర్ చదివే కుర్రాడి నుంచి సినిమా యాక్టర్ల దాక అంతా గంజాయికి అలవాటు పడిపోతున్నారు. పోలీసులు ఎంతగా తనిఖీలు చేపట్టిన హైదరాబాద్ లో మాత్రం గంజాయి వ్యాపారం ఆగడం లేదు. నగరంలో ప్రతీ చోట గంజాయి క్రయవిక్రయాలే కాదు..అది తాగే గంజాయి బ్యాచ్ ల ఆగడాలకు అంతే లేకుండా పోతోంది.

హైదరాబాద్‌ మహానగరంలోని కొత్తపేటలో అర్ధరాత్రి గంజాయి గ్యాంగ్‌ వీరంగం సృష్టించింది. అర్ధరాత్రి వరకు రోడ్లపై బైఠాయించి పోకిరీలు బ్యాచ్‌లుగా గంజాయి తాగుతున్నారు. దీంతో కొత్తపేటలోని ఓ కాలనీలో స్థానికులు ఇబ్బందులు పడుతున్నారు. ఈ క్రమంలో తమ ఇంటి ముందు గంజాయి బ్యాచ్‌ ఉంటే అక్కడి నుంచి వెళ్లాలని ఇంటి యజమాని జనార్దన్ నాయుడు చెప్పారు.

మమ్మల్నే వెళ్లమంటావా అంటూ ఇంటి యజమానిపై ఒక్కసారిగా గంజాయి బ్యాచ్‌ కర్రలతోనూ, రాళ్లతోనూ విచక్షణ రహితంగా దాడి చేశారు. ఆ తర్వాత అక్కడి నుంచి పరారీ అయ్యారు. గంజాయి బ్యాచ్‌ దాడిలో జనార్దన్ నాయుడు తీవ్రంగా గాయపడ్డారు. అతడిని స్థానికులు ఆస్పత్రికి తరలించారు. అతడిపై జరిగిన దాడిని స్థానికులు సెల్‌ఫోన్‌లో వీడియో తీశారు. ప్రతిరోజు ఇలానే బయటనుంచి వచ్చి గంజాయి బ్యాచ్‌ న్యూసెన్స్‌ చేస్తున్నారని స్థానికులు వాపోయారు. తనపై దాడికి సంబంధించి సరూర్‌నగర్‌ పోలీసులకు జనార్దన్ కుటుంబ సభ్యులు ఫిర్యాదు చేశారు. వారి ఫిర్యాదుతో గంజాయి బ్యాచ్‌ను పోలీసులు అదుపులోకి తీసుకున్నారు.

కాగా, జనార్దన్ నాయుడిపై గంజాయి బ్యాచ్ విచక్షణ రహితంగా దాడి చేసిన వీడియో ఒకటి సోషల్ మీడియాలో వైరల్ అవుతోంది. ఇది చూసిన ప్రతీ ఒక్కరూ గంజాయి మూకలపై కఠిన చర్యలు తీసుకోవాలని కామెంట్ చేస్తున్నారు.