Vanga Geetha-YS Jagan
Vanga Geetha : ఏపీ ఎన్నికల్లో ప్రచారానికి శనివారం ఆఖరి రోజు వంగా గీతకు వైసీపీ అధినేత వైఎస్ జగన్ బంపరాఫర్ ఇచ్చారు. ఈ ఎన్నికల్లో కాకినాడ జిల్లా పిఠాపురం అసెంబ్లీ నియోజకవర్గంపై అందరి దృష్టి పడింది. జనసేన అధినేత పవన్ కళ్యాణ్ అక్కడి నుంచి పోటీ చేస్తుండడమే అందుకు కారణం. 2019 ఎన్నికల్లో రెండుచోట్ల పోటీచేసి ఓడిపోయిన పవన్.. ఈసారి ఎలాగైనా విజయం సాధించాలనే పట్టుదలతో పిఠాపురం నియోజకవర్గాన్ని ఎంచుకున్నారు. అదే రీతిలో ప్రచారం సాగించారు.
అటు వైసీపీ కూడా పవన్ కళ్యాణ్ కు గట్టిపోటీ ఇచ్చేందుకు వంగా గీతను బరిలోకి దింపింది. ముఖ్యంగా పిఠాపురం నియోజకవర్గం మీద ప్రత్యేక శ్రద్ధ తీసుకున్న సీఎం వైఎస్ జగన్.. పవన్ ఓటమే లక్ష్యంగా పావులు కదుపుతూ వచ్చారు. ఎన్నికల ప్రచారంలోనూ పిఠాపురాన్ని వైఎస్ జగన్ ఆఖరిగా ఎంచుకున్నారు. పిఠాపురం సభ వేదికగా వంగా గీతకు బంపర్ ఆఫర్ ఇచ్చారు. ఈ సందర్భంగా జగన్ మాట్లాడుతూ పిఠాపురంలో వంగా గీతను గెలిపిస్తే వచ్చే వైసీపీ ప్రభుత్వంలో డిప్యూటీ సీఎంను చేస్తానంటూ ఆఫర్ ఇచ్చారు. పవన్ కళ్యాణ్ గెలిస్తే పిఠాపురంలో ఉండరని.. అదే వంగా గీతను గెలిపిస్తే డిప్యూటీ సీఎంను చేస్తానంటూ ప్రకటించారు.
పిఠాపురం అసెంబ్లీ నియోజకవర్గంలో కాపు సామాజికవర్గ ఓటర్లు అధిక సంఖ్యలో ఉన్నారు. అందుకనే పవన్ కళ్యాణ్ వ్యూహాత్మకంగా ఈ నియోజకవర్గాన్ని ఎవచుకున్నారని రాజకీయ విశ్లేషకులు భావిస్తున్నారు. వైసీపీ కూడా కాపు సామాజికవర్గ మహిళానేత వంగా గీతను అక్కడ బరిలోకి దింపింది. ఇప్పుడు జగన్ కూడా అంతే వ్యూహాత్మకంగా ఆ మెకు డిప్యూటీ సీఎం ఆఫర్ ఇచ్చారు.