Kalki : బాక్సాఫీస్ బాస్.. ప్రభాస్.. వెయ్యి కోట్ల క్లబ్‌లో కల్కి
Kalki Thousand Crore
Kalki Thousand Crore: ప్రభాస్ మరోసారి తాను బాక్సాఫీస్ కా బాస్ అని నిరూపించుకున్నాడు. వెయ్యి కోట్ల క్లబ్ ను రెండు సార్లు అందుకొని చరిత్ర సృష్టించాడు. ప్రభాస్ హీరోగా తెరకెక్కిన కల్కి 2898 ఏడీ మూవీ విడుదలకు ముందు నుంచే సంచలనాలను సృష్టిస్తున్నది. రోజుకో రికార్డును తిరగరాస్తూ చరిత్ర సృష్టిస్తు్న్నది. బాక్సాఫీస్ వద్ద కాసుల వర్షం కురిపిస్తున్నది. తాజాగా రెబల్ స్టార్ ప్రభాస్ ఖాతాలో మరో రికార్డు చేరింది. ఈ సినిమాతో ప్రభాస్ రెండోసారి వెయ్యి కోట్ల రూపాయల కలెక్షన్స్ సాధించిన హీరోగా రికార్డులకు ఎక్కాడు. అంతకు ముందు బాహుబలి -2 తో వెయ్యి కోట్లకు పైగా కలెక్షన్స్ సాధించిన హీరోగా రికార్డు సృష్టించారు. బాహుబలి 2 వరల్డ్ వైడ్ గా రూ. 1810 కోట్లు వసూలు చేసింది. ప్రస్తుతం ప్రభాస్ నటించిన కల్కి 2898 ఏడీ మూవీ ఈ అరుదైన రికార్డును సొంతం చేసుకుంది. ప్రపంచవ్యాప్తంగా రూ. వెయ్యి కోట్ల గ్రాస్ కొల్లగొట్టిన ఇండియన్ మూవీగా రికార్డు సృష్టించింది.
ఇప్పటి దాకా ప్రపంచ వ్యాప్తంగా రూ.1000 కోట్ల గ్రాస్ ని కలెక్ట్ చేసిన సినిమాలు ఆరు ఉన్నాయి. అందులో ప్రభాస్ కల్కి సినిమా ఏడో స్థానంలో ఉంది. అమిర్ ఖాన్ దంగల్, బాహుబలి 2, ఆర్ఆర్ఆర్, కేజీఎఫ్ 2, జవాన్, పఠాన్ సినిమాలు ప్రపంచవ్యాప్తంగా రూ. 1000 కోట్లకు పైగా వసూళ్లు సాధించాయి. దంగల్ సినిమా ఏకంగా రూ. 2024 కోట్లు వసూలు చేసింది. బాహుబలి 2 రూ. 1810 కోట్లు కొల్లగొట్టింది. రాజమౌళి తెరకెక్కించిన ఆర్ఆర్ఆర్ సినిమా రూ. 1387 కోట్లు, ప్రశాంత్ నీల్ రూపొందించిన కేజీఎఫ్ -2 రూ. 1250 కోట్లు, షారూక్ ఖాన్ జవాన్ రూ. 1148 కోట్లు, పఠాన్ రూ. 1050 కోట్లు సంపాదించాయి. ప్రపంచవ్యాప్తంగా వెయ్యి కోట్ల గ్రాస్ ని కలెక్ట్ చేసిన ఏడు సినిమాల్లో మూడు తెలుగు సినిమాలే ఉండడం విశేషం. ప్రపంచవ్యాప్తంగా రెండు సార్లు వెయ్యి కోట్లకు పైగా కలెక్ట్ చేసిన హీరోలుగా షారుక్ ఖాన్, ప్రభాస్ నిలిచారు.
సౌత్ నుంచి ఈ ఫీట్ సాధించిన హీరోగా ప్రభాస్ నిలిచాడు. కాగా, దంగల్ నుంచి పఠాన్ దాకా ఆ సినిమాలు ఫుల్ రన్ లో మాత్రమే వెయ్యి కోట్లకు పైగా వసూళ్లు సాధించాయి. అయితే కల్కి మాత్రం తొలి రెండు వారాల్లోనే ఈ రికార్డును అధిగమించింది. ఈ సినిమా ఇంకా రన్ లో ఉండడంతో వసూళ్లు మరింత వచ్చే అవకాశాలు ఉన్నాయి. ఇక నార్త్ అమెరికాలోనూ కల్కి2898 ఏడీ అరుదైన రికార్డుని సాధించింది. 16.2 మిలియన్ డాలర్లు కొల్లగొట్టి, నాన్ బాహుబలి రికార్డులను బద్దలుకొట్టింది. టికెట్ బుకింగ్ సైట్ బుక్ మై షోలో కోటికి పైగా టికెట్లు అమ్ముడైన సినిమాగా కల్కి మరో రికార్డును సృష్టించింది.