KTR
KTR : మాజీమంత్రి, బీఆర్ఎస్ నేత కేటీఆర్ కు చేదు అనుభవం ఎదురైంది. ప్రొఫెసర్ సాయిబాబా భౌతికకాయానికి నివాళులర్పించడానికి వచ్చిన ఆయనను ఉద్యమకారులే, పౌరహక్కుల సంఘం నేతలు అడ్డుకున్నారు. కేటీఆర్ గో బ్యాక్.. కేటీఆర్ గో బ్యాక్ అంటూ నినాదాలు చేశారు. బీఆర్ఎస్ పార్టీ అధికారంలో ఉన్నప్పుడు, కేటీఆర్ మంత్రిగా ఉన్పప్పుడు, ఉద్యమకారులు, పౌరహక్కుల నేతలపై ఉక్కుపాదం మోపిందంటూ ఆగ్రహం వ్యక్తం చేశారు. ఉపా వంటి తీవ్రమైన కేసులు పెట్టి జైళ్లలో పెట్టిందంటూ నినాదాలు చేశారు. ప్రొఫెసర్ హరగోపాల్, కోదండరాం, విమలక్క వంటి వారిపై కేసులు పెట్టించి, వేధించి, జైళ్లకు పంపించిన చరిత్ర బీఆర్ఎస్ పార్టీదని, అలాంటి కేటీఆర్ ఇప్పుడు సాయిబాబాకు ఎలా నివాళులు అర్పిస్తారని ప్రశ్నించారు.
ఉద్యమకారులు ఆగ్రహంతో గో బ్యాక్ కేటీఆర్ అంటూ నినాదాలు చేస్తున్నా కేటీఆర్ మౌనంగా ఉన్నారు. నివాళులు అర్పించి మౌనంగా వెనుదిరిగారు. కనీసం సమాధానం కూడా కేటీఆర్ చెప్పలేకపోయారు. తీవ్ర అవమానం, చేదు అనుభవంతో అక్కడి నుంచి కేటీఆర్ వెళ్లిపోయారు.