TTD EO Shyamala Rao : శ్రీవారి గరుడసేవకు ఏర్పాట్లు పూర్తి : టీటీడీ ఈవో శ్యామలరావు

TTD EO Shyamala Rao : తిరుమలలో బ్రహ్మాండ నాయకుడి బ్రహ్మోత్సవాలు అంగరంగ వైభవంగా, కన్నుల పండువగా జరుగుతున్నాయి. బ్రహ్మోత్సవాల్లో భాగంగా అక్టోబరు 8న మలయప్పస్వామి గరుడ వాహనంపై భక్తులకు దర్శనమిస్తారు. ఈ వేడుకను ప్రత్యక్షంగా వీక్షించేందుకు లక్షలాది మంది భక్తులు తిరుమలకు వస్తారు. భక్తుల రద్దీ దృష్ట్యా అన్ని ఏర్పాట్లు పూర్తి చేసినట్లు టీటీడీ ఈవో శ్యామలరావు తెలిపారు. సుమారు 3.5 లక్షల మంది భక్తులు వస్తారని అంచనా వేసినట్లు చెప్పారు. భక్తుల కోసం ప్రధాన, ముఖ్యమైన కూడళ్లలోనూ అన్నప్రసాదాన్ని అందుబాటులో ఉంచినట్లు తెలిపారు. గరుడవాహన సేవకు భక్తుల తాకిడి అధికంగా ఉండనున్న నేపథ్యంలో కొండపైకి అధిక వాహనాలను అనుమతించడం లేదని, భక్తులు సహకరించాలని శ్యామలరావు విజ్ఞప్తి చేశారు. రేపు ఒక్కరోజే కొండమీది నుంచి కిందకి, కింది నుంచి కొండమీదికి ఏపీఎస్ ఆర్టీసీ 400కు పైగా బస్సులతో 3 వేల ట్రిప్పులను నడిపేందుకు ఏర్పాట్లు చేసిందని వివరించారు. కాగా, రేపు వీఐపీ బ్రేక్ దర్శనాలను రద్దు చేసింది.