Jabardasth Comedian
Jabardasth Comedian : ప్రముఖ టీవీ ఛానెల్లో ప్రసారమవుతున్న జబర్దస్త్ కామెడీ షో గురించి ప్రత్యేకంగా చెప్పాల్సిన పనిలేదు. గత పదేళ్లుగా ఈ షో ఎంతోమందిని అలరిస్తోంది. జబర్దస్ ఎంతో మందికి లైఫ్ ఇచ్చింది. ఈ షో కారణంగా ఎంతో మంది తెలుగు సినిమా ఇండస్ట్రీకి కమెడీయన్లుగా పరిచయం అయ్యారు. వరుస సినిమాలు చేసుకుంటూ పాపులారిటీ సంపాదించుకున్నారు. ప్రస్తుతం ఇండస్ట్రీలో హీరోలు, నటులుగా, డైరెక్టర్లుగా, సపోర్టింగ్ యాక్టర్లుగా, టెక్నీషియన్లుగా.. ఇలా పలు విభాగాల్లో జబర్దస్త్ కమెడియన్లు తమ సత్తా ఏంటో నిరూపించుకుంటున్నారు. షకలక శంకర్, సుడిగాలి సుధీర్, గెటప్ శీను ఏకంగా హీరోలుగా వెండితెర మీద తమ అదృష్టాన్ని పరీక్షించుకుంటున్నారు.
ఇక గతేడాది సంచనాలు నమోదు చేసిన బలగం సినిమాతో వేణు యెల్దండి దర్శకుడి మారిపోయాడు. వరుస సినిమాలు చేస్తూ క్రేజీ డైరెక్టర్ల లిస్టులో చేరిపోయాడు. త్వరలోనే ధన రాజ్ రామం రాఘవం సినిమాతో దర్శకుడిగా మెగా ఫోన్ పట్టబోతున్నాడు. వీరితో పాటు హైపర్ ఆది, చమ్మక్ చంద్ర, మహేశ్, రాకెట్ రాఘవ.. ఇలా చాలామంది సినిమాల్లో తమదైన శైలిలో అలరిస్తున్నారు. అయితే వేణు, ధనరాజ్ బాటలోనే మరో జబర్దస్త్ కమెడియన్ మెగా ఫోన్ పట్టబోతున్నాడు. తన దైన ఆటో పంచులతో బుల్లితెర ప్రేక్షకులను కడుపుబ్బా నవ్విస్తున్న ఆటో రామ్ ప్రసాద్ త్వరలోనే దర్శకుడిగా మారుతున్నట్లు తెలుస్తోంది.
సుడిగాలి సుధీర్, గెటప్ శీను, రాం ప్రసాద్.. ఈ ముగ్గురూ కలిసి జబర్దస్త్ షోలో చేసిన హంగామా మామూలుది కాదు. కేవలం ఆన్ స్రీన్‌లోనే కాదు రియల్ లైఫ్ లోనూ వీరు బెస్ట్ ఫ్రెండ్స్. ఈ నేపథ్యంలో ఇప్పటికే ఇండస్ట్రీలో రాణిస్తోన్న సుధీర్, గెటప్ శీనులను హీరోలుగా పెట్టి ఆటో రామ్ ప్రసాద్ ఓ సినిమా తీయనున్నాడట. ఓ మంచి కామెడీ ఎంటర్ సినిమాను ప్లాన్ చేస్తున్నట్లు తెలుస్తోంది. నిర్మాతలకు కథ నచ్చితే త్వరలోనే తమ సినిమాను అఫీషియల్ గా పట్టాలెక్కిస్తానని రాం ప్రసాద్ ఓ ఇంటర్వ్యూలో ప్రకటించారు. అయితే దీనిపై ఇంకా అధికారిక ప్రకటన రావాల్సి ఉంది. కాగా గెటప్ శీను హీరోగా నటించిన రాజూ యాదవ్ రేపు థియేటర్లలోకి రానుంది. చిరంజీవి కూడా రాజుయాదవ్ సినిమాకు ప్రమోషన్ చేయడం ఆసక్తిని రేకెత్తిస్తోంది.