Anna Canteen
Anna Canteen : ఏపీ ముఖ్యమంత్రి చంద్రబాబు మానసపుత్రికైన అన్న క్యాంటీన్ ను హైటెక్ సిటీ ప్రాంతంలో ఏర్పాటు చేస్తున్నట్లు సీబీఎన్ ఫోరం వ్యవస్థాపకులు జెనెక్స్ అమర్ తెలిపారు. మాదాపూర్ 100 ఫీట్ రోడ్డులో క్యాంటీన్ నిర్మాణ పనులు పూర్తి కావడంతో శనివారం సాయంత్రం జ్యోతి వెలిగించి ప్రారంభించారు. ఈ సందర్భంగా అమర్ మాట్లాడుతూ ఏపీలో టీడీపీ ప్రభుత్వం ఏర్పాటు చేసిన అన్న క్యాంటీన్లు పేదల ఆకలి తీర్చి ఆదరణ పొందాయన్నారు. చంద్రబాబు స్ఫూర్తితో తెలంగాణలో సైతం అన్న క్యాంటీన్ ఏర్పాటు చేశామని తెలిపారు. జులై మొదటి వారంలో రోజూ పేదలకు ఉచితంగా భోజనం అందించనున్నట్లు చెప్పారు.
ఏపీతో పాటు తెలంగాణలో చంద్రబాబు ఆశయాలను ముందుకు తీసుకెళ్లేందుకు సీబీఎన్ ఫోరం తరపున కృషి చేస్తున్నట్లు తెలిపారు. అంతకుముందు రామోజీ గ్రూపు సంస్థల ఛైర్మన్ రామోజీరావు చిత్రపటానికి ఫోరం సభ్యులు నివాళులర్పించారు. ఈ కార్యక్రమంలో మాజీ ఎమ్మెల్యే కాట్రగడ్డ ప్రసూన, ఫోరం సభ్యలు లలిత, సత్యనారాయణ తదితరులు పాల్గొన్నారు.