David Miller
David Miller : మూడు మ్యాచ్ లు ఆడితే భారీ మొత్తం ఆఫర్.. మరో వైపు పెళ్లి తేదీ దగ్గరపడుతోంది. ఇలాంటి సమయంలో ఓ క్రికెటర్ సంచలన నిర్ణయం తీసుకున్నారు. అతడే డేవిడ్ మిల్లర్. ఐపీఎల్ లో గుజరాత్ టైటాన్స్ కు ఆడుతున్నాడు. ప్రస్తుతం అతడు బంగ్లాదేశ్ ప్రీమియర్ లీగ్(బీపీఎల్) లో హాట్ టాపిక్ గా మారాడు. ఫార్చూన్ బరిషల్ జట్టుకు మూడు మ్యాచ్ లు ఆడితే ఏకంగా రూ.1.25 కోట్లను చెల్లించేందుకు ఆ ఫ్రాంచైజీ ఆఫర్ ఇచ్చింది. దీని కోసం తన పెళ్లిని కూడా వాయిదా వేసుకుని బరిలో దిగాడు. ఈ విషయాన్ని పాక్ క్రికెట్ దిగ్గజం వసీం ఆక్రం వెల్లడించాడు.
ఫిబ్రవరి 26(ఎలిమినేటర్), ఫిబ్రవరి 28(క్వాలిఫయర్ 2), మార్చి 1న (ఫైనల్) ఫార్చూన్ బరిషల్ కు మిల్లర్ ఆడాడు. చివరకు ఆ జట్టే బీపీఎల్ చాంపియన్ గా నిలిచింది. తాజాగా ఓ చర్చా కార్యక్రమంలో వసీమ్ ఆక్రం మాట్లాడుతూ..‘‘పాకిస్తాన్ సూపర్ లీగ్ తో బిజీగా ఉన్నా.. బీపీఎల్ ను పెద్దగా పట్టించుకోలేదు. అయితే ఎవరు చాంపియన్ గా నిలిచారనేది తెలుసుకున్నా..ఈ సందర్భంగా డేవిడ్ మిల్లర్ గురించి తెలిసింది. చివరి మూడు మ్యాచ్ లను ఆడితే అతడికి రూ.1.25 కోట్లు ఇచ్చేందుకు ఫ్రాంచైజీ ముందుకొచ్చింది. దీంతో అతడు పెళ్లిని కూడా వాయిదా వేసుకున్నాడు..’’ అని చెప్పుకొచ్చాడు.
మిల్లర్ బీపీఎల్ ముగిసిన తర్వాత తన గర్ల్ ఫ్రెండ్ కామిల్లా హారిస్ ను (మార్చి 10న) పెళ్లి చేసుకున్నాడు. మిల్లర్ మూడు మ్యాచ్ లకు భారీ మొత్తం తీసుకోవడమే కాదు.. అందులోనూ విజయం సాధించి ఆ తర్వాత గ్రాండ్ గా పెళ్లి చేసుకుని ప్రస్తుతం తన భార్యతో ఎంజాయ్ చేస్తున్నాడు.