TDP Victory : అమెరికా, ఆస్ట్రేలియా, లండన్..ప్రపంచం నలుమూలల టీడీపీ ఘన విజయోత్సవాలు!
TDP Victory Celebrations
TDP Victory : ఏపీలో టీడీపీ కూటమి ప్రభంజనం సృష్టించింది. అసెంబ్లీతో పాటు పార్లమెంట్‌ స్థానాల్లో కూటమి అభ్యర్థులు భారీ మెజార్టీతో గెలిచారు. భారీ సీట్లతో టీడీపీ కూటమి ప్రభుత్వం ఏర్పాటు చేయనుంది. ఈనెల 9వ తేదీన సీఎంగా చంద్రబాబు అమరావతిలో ప్రమాణస్వీకారం చేయనున్నట్లు వార్తలు వచ్చాయి. ఇప్పటి వరకు టీడీపీ 135 సీట్లలో, జనసేన 21 సీట్లలో, బీజేపీ 8 స్థానాల్లో, వైసీపీ 11సీట్లను గెలుచుకుంది.
ఆంధ్రప్రదేశ్ లో టీడీపీ కూటమి ఘన విజయం సాధించడం పై దేశవిదేశాల్లో తెలుగు తమ్ముళ్లు సంబరాలు చేసుకున్నారు. అమెరికా, ఆస్ట్రేలియా, బ్రిటన్, ఇతర యూరప్ దేశాల్లో స్థిరపడిన తెలుగు ప్రజలు కేక్ కట్‌చేసి, శుభాకాంక్షలు తెలిపారు. కూటమి గెలుపును తమ గెలుపుగా భావించిన తెలుగు వాళ్లు విశ్వవ్యాప్తంగా జరుపుకుంటున్నారు. తెలుగు యువత ఆధ్వర్యంలో విజయోత్సవ సంబరాలు నిర్వహించారు. తెలుగుదేశం పార్టీ ఘన విజయం సాధించడంతో మిఠాయిలు పంచుకుని తమ సంతోషాన్ని వ్యక్తం చేశారు. తెలుగు యువత ఆధ్వర్యంలో పలు చోట్ల కార్ల ర్యాలీ నిర్వహించారు. బాణాసంచా కాల్చి టీడీపీ గెలుపును గ్రాండ్‌గా సెలబ్రేట్ చేసుకున్నారు.
టీడీపీ ఘన విజయంపై అమెరికాలోని అలబామా యూనివర్సిటీ స్టూడెంట్స్ హర్షం వ్యక్తం చేశారు. ఈ యూనివర్సిటీ మాత్రమే కాదు అమెరికాలోని పలు యూనివర్సిటీల్లో వందలాది విద్యార్థులు, ఇతర ఎన్ ఆర్ఐలు ఘనంగా సెలబ్రేట్ చేసుకున్నారు. అలాగే లండన్ లో ఉన్న తెలుగు వారు జై బాబు..జైజై బాబు అంటే నినాదాలతో హోరెత్తించారు. ఆస్ట్రేలియాలోని సిడ్నీలో వందలాది మంది టీడీపీ జెండాలతో సెలబ్రేట్ చేసుకున్నారు. జై టీడీపీ, జై చంద్రబాబు అంటూ నినదించారు. అనంతరం స్వీట్లు పంచి ఒకరికొకరు తినిపించుకున్నారు. ఈ వేడుకలను చూస్తే ఏపీలో ఉన్నామా? విదేశాల్లో ఉన్నామా? అనిపించడం ఖాయం. చంద్రబాబు మరోసారి సీఎం అవుతుండడంతో ప్రతీ ఒక్కరి కళ్లలో ఆనందం కనిపిస్తోంది.