Ambani Wedding
Ambani Wedding : రిలయన్స్ అధినేత ముకేశ్ అంబానీ కుమారుడు అనంత్ అంబానీ-రాధిక మర్చంట్ వివాహ వేడుక కన్నుల పండుగగా జరిగింది. ప్రపంచంలో పేరుగాంచిన సినీ, రాజకీయ, క్రీడా ప్రముఖులెందరో ఈ పెళ్లి వేడుకల్లో పాల్గొన్నారు. ముంబైలోని జియో కన్వెన్షన్ సెంటర్ లో అతిరథ మహారథుల మధ్య అత్యంత కట్టుదిట్టమైన భద్రత నడుమ జరిగిన ఈ వేడుకల్లో ఇద్దరు ఏపీ వాసులు ఆహ్వానం లేకుండా పాల్గొనేందుకు ప్రయత్నించి పోలీసులకు దొరికిపోయారు.
నిందితుల్లో ఒకరిని యూట్యూబర్ వెంకటేశ్ (26)గా, మరొకరిని వ్యాపారవేత్తగా చెప్పుకుంటున్న షేక్ మహ్మద్ షఫీ (28)గా గుర్తించినట్లు పోలీసులు తెలిపారు. పెళ్లి వేడుకల్లో పాల్గొనేందుకు ఈ ఇద్దరూ ఏపీ నుంచి ముంబై వచ్చారని. ఆహ్వానం లేకుండా లోపలికి వెళ్లేందుకు ప్రయత్నించడంతో వారిద్దరిపై పలు సెక్షన్ల కింద కేసులు నమోదు చేశామన్నారు. జియో వరల్డ్ కన్వెన్షన్ సెంటర్ వద్ద అనుమానాస్పదంగా కనిపించిన వారిని భద్రతా సిబ్బంది అడ్డగించి పోలీసులకు అప్పగించారు. దీంతో వారిని బీకేసీ పోలీస్ స్టేషన్ కు తరలించి వారిపై కేసులు నమోదు చేశారు.