BJP List : బీజేపీ మొదటి జాబితాలో అక్షయ్ కుమార్, కంగనా..!

BJP List

BJP List : లోక్ సభ ఎన్నికలు దగ్గర పడుతున్న తరుణంలో బీజేపీ స్పీడ్ పెంచింది. ఇప్పటికే ప్రధాన మంత్రి నరేంద్ర మోడీ, మంత్రులు దేశంలో విస్తృతంగా పర్యటిస్తున్నారు. మరోవైపు బీజేపీ అధిష్ఠానం అభ్యర్థుల ఎంపికపై దృష్టి పెట్టింది. 100 నుంచి 110 మందితో మొదటి జాబితా ప్రకటించేందుకు భారతీయ జనతా పార్టీ సిద్ధమైనట్లు వార్తలు వస్తున్నాయి. మొదటి జాబితాలో యువకులు, కొత్త వ్యక్తులకు చోటు కల్పించనున్నట్లు తెలుస్తోంది.

ఇందులో సెలబ్రెటీలు కూడా ఉన్నట్లు వార్తలు వస్తున్నాయి. బాలీవుడ్ నటులు అక్షయ్ కుమార్, కంగనా రనౌత్ కు బీజేపీ టికెట్ ఇచ్చేందుకు సిద్ధమైనట్లు సోషల్ మీడియాలో ప్రచారం కొనసాగుతోంది. ఫస్ట్ లిస్ట్ లో వీరి పేరు ఉండే అకాశం ఉందని జాతీయ మీడియాలో కథనలు వస్తున్నాయి. ఢిల్లీలోని చాందిని చౌక్ నుంచి అక్షయ్ కుమార్ బరిలో దించే అవకాశం ఉన్నట్లు తెలుస్తోంది. ఇక కంగనా రనౌత్ ను హిమాచల్ ప్రదేశ్ లోని మండి నుంచి పోటీ చేయించే అవకాశం ఉన్నట్లు తెలుస్తోంది.

కాగా కంగనా రనౌత్ ఈ మధ్య కొన్ని ఆసక్తికర వ్యాఖ్యలు చేసింది. రాజకీయాల్లోకి వచ్చేందుకు ఇదే సరైన టైమ్ అని చెప్పారు. దీంతో ఆమెకు బీజేపీ టికెట్ ఖాయంగా తెలుస్తోంది. అభ్యర్థుల ఎంపికపై బీజేపీ ఎన్నికల కమిటీ శుక్రవారం సమావేశం నిర్వహించింది. ఈ భేటీ ప్రధాని నరేంద్ర మోడీ అధ్యక్షతన జరిగింది. వీలైనంత త్వరగా మొదటి జాబితా విడుదల చేయాలని ఎన్నికల కమిటీ భేటీలో నిర్ణయించినట్లు తెలుస్తోంది.

తెలంగాణకు సంబంధించి మొదటి జాబితాలో 6 నుంచి ఎనిమిది మంది పేర్లు ప్రకటించే అవకాశం ఉంది. కరీంనగర్ నుంచి సిట్టింగ్ ఎంపీ బండి సంజయ్, నిజామాబాద్ నుంచి సిట్టింగ్ ఎంపీ ధర్మపురి అర్వింద్, చేవెళ్ల నుంచి కొండా విశ్వేశ్వర్ రెడ్డి, నాగర్ కర్నూల్ నుంచి భరత్, సికింద్రాబాద్ నుంచి కిషన్ రెడ్డి, హైదరాబాద్ నుంచి మాధవి లత, భువనగిరి నుంచి బూర నర్సయ్య గౌడ్ పేర్లు మొదటి జాబితాలో ఉండే అవకాశం ఉందని తెలిస్తోంది. ఇక మల్కాజిగిరి నుంచి ఈటల రాజేందర్, మురళీధర్ రావు తీవ్రంగా పోటీ పడుతున్నట్లు వార్తలు వస్తున్నాయి.