Pushpa 3
Pushpa 3 : ‘‘నీ యవ్వ తగ్గేదేలే..’’ పుష్పరాజ్ చేసిన సందడి దేశమంతా మెచ్చింది. తెలుగు సినిమాగా రిలీజైన ఈ మూవీ పాన్ ఇండియా లెవల్లో దుమ్మురేపింది. వీర మాస్ కథకు.. అద్భుతమైన పాటలు తోడైతే సినిమా ఏ రేంజ్ లో హిట్టు అవుద్దో పుష్ప నిరూపించింది. వాస్తవానికి తెలుగులో విడుదలైనప్పుడు తొలి రెండు రోజులకు జనాలకు అంతగా ఎక్కలేదు. తొలి రోజైతే ప్లాప్ టాకే వచ్చింది. ఆ తర్వాత మెల్లమెల్లగా పుంజుకుని దేశానికే నచ్చేసింది. ఈ సినిమాలోని అల్లు అర్జున్ మేనరిజం, తగ్గేదేలే డైలాగ్ లు..ఇలా ప్రతీది పాన్ ఇండియా ఫ్యాన్స్ తెగ ఆకట్టుకుంది.
ఈ సినిమాకు దేశవ్యాప్తంగా వచ్చిన క్రేజ్ తో సుకుమార్ పార్ట్-2 కూడా తీస్తున్నారు. ప్రస్తుతం సినిమా షూటింగ్ నడుస్తోంది. మరి కొన్ని నెలల్లోనే సినిమా థియేటర్లలోకి రాబోతోంది. పుష్ప-2పై పాన్ ఇండియా వ్యాప్తంగా భారీ అంచనాలు ఉన్నాయి. సినిమా జనాలకు నచ్చేస్తే వెయ్యి కోట్ల మార్క్ దాటవచ్చని అంటున్నారు. ఎందుకంటే ఈ సినిమా క్రేజ్ అలాంటిది. పుష్ప-2 కోసం సకుమార్ కూడా అద్భుతమైన కథను సిద్ధం చేసినట్టు పాన్ ఇండియా జనాలను ఆకట్టుకునే విధంగా ఊర మాస్ ఎంటర్ టైనర్ గా రాబోతోందని తెలుస్తోంది. అయితే ఈ సినిమాపై మరో కొత్త అంశం నిన్ననే తెరపైకి వచ్చింది. అది ఏంటంటే..
జర్మనీలో జరుగుతున్న ప్రతిష్ఠాత్మక 74వ బెర్లిన్ ఫిలిం ఫెస్టివల్ లో ఐకాన్ స్టార్ అల్లు అర్జున్ చీఫ్ గెస్ట్ గా హాజరయ్యారు. ఈ సందర్భంగా బన్నీ భారతీయ సినీ ప్రాముఖ్యత గురించి మాట్లాడారు. ఆ తర్వాత ఓ ఇంటర్నేషనల్ టీవీ చానల్ తో మాట్లాడుతూ పుష్ప-2 సినిమా గురించి చెప్పుకొచ్చారు. మొదటి పార్ట్ కంటే రెండోది అద్భుతంగా ఉంటుందన్నారు. ఇక్కడ ట్విస్ట్ ఏంటంటే ఈ సినిమా మూడో పార్ట్ ను కూడా మీరు ఆశించవచ్చు అని చెప్పారు. పుష్ప ను ఫ్రాంఛైజీగా మార్చాలని అనుకుంటున్నాం’’ అని తెలిపారు. బన్నీ కామెంట్స్ తో ఫ్యాన్స్ సంబరాలు చేసుకుంటున్నారు. అదే జరిగితే ఇక బన్నీ, అల్లు అర్జున్ పేర్లు కాస్త ‘పుష్ప’ గా స్థిరపడిపోతాయి కాబోలు అని ట్వీట్ చేస్తున్నారు.