Sardar-2 : కార్తి ‘సర్దార్-2’ సెట్ లో ప్రమాదం.. ఒకరి మృతి

Sardar-2

Sardar-2 : కార్తి హీరోగా పీఎస్ మిత్రన్ దర్శకత్వంలో రూపొందుతున్న ‘సర్దార్-2’ చిత్ర షూటింగ్ లో ప్రమాదం జరిగింది. ఒక భారీ ఫైట్ సీన్ షూట్ చేస్తున్న క్రమంలో ఈ ప్రమాదం చోటు చేసుకుంది. పీఎస్ మిత్రన్ దర్శకత్వంలో వచ్చిన సర్దార్ చిత్రానికి సీక్వెల్ గా పార్ట్-2 ప్రకటన వచ్చిన కొద్ది రోజుల్లోనే షూటింగ్ ను ప్రారంభించారు.

మిషన్ కాంబోడియా నేపథ్యంలో సాగే సర్దార్-2 పూజా కార్యక్రమం ఇటీవలే చెన్నైలో జరిగింది. జులై 15 నుంచి రెగ్యులర్ షూటింగ్ చేస్తున్నారు. అయితే, ఈ సినిమాకు సంబంధించి ఒక ఫైట్ సీన్ ను తెరకెక్కిస్తున్న క్రమంలో సెట్స్ లో ప్రమాదం జరిగింది. ఎజుమలై అనే ఫైట్ మాస్టర్ సుమారు 20 అడుగుల ఎత్తు నుంచి కిందపడి మృతి చెందాడు. ఎక్కువ ఎత్తు నుంచి కింద పడడంతో ఆయన ఛాతీ భాగంలో తీవ్ర గాయమైంది. దీంతో ఊపిరితిత్తుల్లో రక్తస్రావం కావడం వల్లే అతడు మృతి చెందాడని వైద్యులు తెలిపారు. ఈప్రమాదంపై స్థానిక పోలీసులు కేసు నమోదు చేశారు.