ACA Arrangements For Semis
ACA Arrangements For Semis : ఈ నెల 15న జరిగే ప్రపంచ కప్ క్రికెట్ తొలి సెమీస్ మ్యాచ్ వీక్షించేందుకు ఆంధ్రా క్రికెట్ అసోసియేషన్ మూడు నగరాల్లో ఏర్పాట్లు చేస్తున్నది. స్టేడియంలో భారీ స్క్రీన్లతో మ్యాచ్ ప్రత్యక్ష ప్రసారం చేసేందుకు ముందుకు వచ్చింది. మ్యాచ్‌లను తిలకించేందుకు ఉచితంగా ప్రవేశం కల్పిస్తున్నట్లు ఆంధ్రా క్రికెట్ అసోసియేషన్ కార్యదర్శి ఎస్‌ఆర్‌ గోపినాథ్‌రెడ్డి వెల్లడించారు.
భారత్, న్యూజిలాండ్‌ మధ్య జరిగే వరల్డ్ కప్ సెమీఫైనల్‌ మ్యాచ్‌ను వీక్షించేందుకు ఆంధ్ర క్రికెట్ అసోసియేషన్ ఆధ్వర్యంలో ఈ నెల 15 న మధ్యాహ్నం 1.30 నుంచి రాత్రి 11 గంటల వరకు రాష్ట్రంలోని మూడు నగరాల్లో భారీ స్క్రీన్లను ఏర్పాటు చేస్తున్నది.
క్రికెట్ మ్యాచ్ తిలకించేందుకు ఫ్యాన్ పార్క్‌లను ఏర్పాటు చేస్తున్నట్లు ఏసీఏ కార్యదర్శి వెల్లడించారు. ఇందులో భాగంగా వైజాగ్‌ ఆర్కే బీచ్‌ లో కాళీ మాత టెంపుల్‌ వద్ద, విజయవాడ ఎంజీ రోడ్డులోని ఇందిరా గాంధీ మున్సిపల్‌ స్టేడియం, వైఎస్ఆర్ కడప జిల్లాలోని ఆర్ట్స్‌ కాలేజీ మైదానాల్లో ఒక్కో చోట కనీసం 10 వేల మంది తిలకించేందుకు భారీ స్క్రీన్లను ఏర్పాటు చేసేందుకు ముందుకు వచ్చారు.
ఇక్కడ మ్యాచ్ లు వీక్షించేందుకు ఎలాంటి రుసుము తీసుకోవడం లేదు. ఆయా మైదానాల్లోకి ఉచితంగానే ప్రవేశాలు కల్పించబోతున్నారు. క్రికెట్ క్రీడాభిమానులు ఈ అవకాశాన్ని వినియోగించుకోవాలిన ఏసీఏ కోరింది. ఆయా ప్రాంతాల్లో ఫుడ్‌ కౌంటర్లు కూడా ఏర్పాటు చేస్తామని తెలిపారు.