Deputy CM Pawan : డిప్యూటీ సీఎం పవన్ కు అమరావతిలో ఘనస్వాగతం

Deputy CM Pawan

Deputy CM Pawan : ఆంధ్రప్రదేశ్ అమరావతి రాజధాని రైతులు డిప్యూటీ సీఎం పవన్ కళ్యాణ్ కు ఘన స్వాగతం పలికారు. మంత్రిగా ప్రమాణం చేసిన పవన్ కళ్యాణ్ తొలిసారిగా అమరావతికి రావడంతో రైతులు, మహిళలు, కూటమి నాయకులు, శ్రేణులు పూలమాలలతో స్వాగతం పలికారు. హైదరాబాద్ నుంచి గన్నవరం ఎయిర్ పోర్టుకు చేరుకున్న ఆయనకు అడుగడుగునా పూలు చల్లారు. అమరావతిని రాజధానిగా కొనసాగించాలంటూ రైతులు చేపట్టిన దీక్షకు సంఘీభావం తెలుపడంతో పాటు టీడీపీ అధికారంలోకి రావడానికి ముఖ్యభూమిక పోషించిన పవన్ కళ్యాణ్ కు యాక్సెస్ రోడ్డు వద్ద గజమాలతో సత్కరించారు.

వెంకటపాలెం నుంచి మందడం వరకు ఆయన అభిమానులు వేలాది వాహనాలతో ఊరేగింపు నిర్వహించారు. రాజధాని రైతులు, ప్రజలు, అభిమానులకు అభివాదం చేస్తూ పవన్ ముందుకు సాగారు. అనంతరం పవన్ వెలగపూడి సచివాలయానికి చేరుకున్నారు. తొలిసారి సచివాలయానికి వచ్చిన ఆయనకు ఉద్యోగులు ఘన స్వాగతం పలికారు.

సచివాలయంలో ముఖ్యమంత్రి చంద్రబాబుతో పవన్ కళ్యాణ్ మర్యాదపూర్వకంగా భేటీ అయ్యారు. రెండో బ్లాక్ లోని తన ఛాంబర్ ను పరిశీలించేందుకు ఉప ముఖ్యమంత్రి రాగా.. పెద్ద ఎత్తున ఉద్యోగులు, అభిమానులు గుమిగూడడంతో ఛాంబర్ల పరిశీలనకు వెళ్లలేకపోయారు. బుధవారం ఉదయం విజయవాడలోని క్యాంపు కార్యాలయంలో డిప్యూటీ సీఎంగా బాధ్యతలు స్వీకరించనున్నారు.