Prabhas:పార్ట్ 2 మ‌రింత అద్భుతంగా ఉంటుంది:ప్రభాస్
Prabhas:పాన్ ఇండియా స్టార్ ప్రభాస్ క‌థానాయ‌కుడిగా న‌టించిన భారీ హైవోల్టేజ్ యాక్ష‌న్ ఎంట‌ర్ టైన‌ర్ `సలార్: పార్ట్ 1 సీజ్ ఫైర్‌`. భార‌తీయ ప్రేక్ష‌కుల్ని `కేజీఎఫ్‌` సిరీస్ సినిమాల‌తో మెస్మ‌రైజ్ చేసిన టాలెంటెడ్ డైరెక్ట‌ర్ ప్ర‌శాంత్ నీల్ ఈ మూవీని అత్యంత ప్ర‌తిష్టాత్మ‌కంగా తెర‌కెక్కించారు. హోంబ‌లే ఫిలింస్ బ్యాన‌ర్‌పై భారీ స్థాయిలో రూపొందిన ఈ సినిమా వ‌ర‌ల్డ్ వైడ్‌గా డిసెంబ‌ర్ 22న విడుద‌లైన విష‌యం తెలిసిందే. డే వ‌న్ నుంచి బాక్సాఫీస్ వ‌ద్ద రికార్డులు సృష్టిస్తూ వ‌సూళ్ల‌ని సునామీని క్రియేట్ చేస్తోంది.
ప్రభాస్ కెరీర్‌లోనే అత్యంత భారీ ఓపెనింగ్స్‌ని రాబ‌ట్టిన సినిమాగా నిలిచింది. ఈ సంద‌ర్భంగా ఓ హాలీవుడ్ మీడియాలో ముచ్చ‌టించిన ప్రభాస్ `సలార్`పై ఆస‌క్తిక‌ర వ్యాఖ్య‌లు చేశారు. “సలార్` క‌థ విన్న వెంట‌నే నాకెంత‌గానో న‌చ్చింది. వెంట‌నే అంగీక‌రించాను. నా కెరీర్‌లో నేను చేసిన పాత్రల్లో భిన్న‌మైన పాత్రల్లో ఇది ఒక‌టి. ఎంతో స‌వాలుతో కూడుకున్న‌ది. `బాహుబ‌లి` నా కెరీర్‌కు ఓ బెంచ్ మార్క్‌ను క్రియేట్ చేసింది. ఆ త‌రువాత ఎంచుకున్న సినిమాల్లో కొత్త‌ద‌నం ఉండేలా చూసుకున్నా.
అందులో భాగంగానే `సలార్`కు ఓకే చెప్పాను. ప్రేక్ష‌కులు కూడా వైవిధ్య‌మైన కంటెంట్‌నే ఇష్ట‌ప‌డుతున్నారు. ప్ర‌స్తుతం ప్ర‌పంచం అంతా భార‌తీయ చిత్రాల గురించే చ‌ర్చిస్తోంది. టాలీవుడ్‌, కోలీవుడ్‌, బాలీవుడ్ అని కాకుండా ఇండియ‌న్ సినిమా ఇండ‌స్ట్రీ అని గుర్తిస్తున్నారు. రాజ‌మౌళి, ప్ర‌శాంత్ నీల్ వంటి ద‌ర్శ‌కుల‌తో క‌లిసి ప‌ని చేయ‌డం ఓ అద్భుత‌మైన అనుభూతి. `సలార్ పార్ట్ 1` చివ‌ర‌లోనే పార్ట్ 2 ఉంటుంద‌ని స్ప‌ష్టం చేశాం. మొద‌టి పార్ట్‌తో పోలిస్తే రెండ‌వ‌ది మ‌రింత అద్భుతంగా ఉంటుంది` అన్నారు.