Search
HomeExclusive

Shah Rukh Khan:వైష్ణో దేవి ఆల‌య సంద‌ర్శ‌న‌లో షారూక్ ఖాన్‌

Shah Rukh Khan:కింగ్ ఖాన్ షారూఖ్ న‌టించిన ప‌ఠాన్ – జ‌వాన్ ఈ ఏడాది బిగ్గెస్ట్ బ్లాక్ బ‌స్ట‌ర్లుగా నిలిచాయి. ఇప్పుడు డంకీ చిత్రంతో హ్యాట్రిక్ కొట్టాల‌ని క‌ల‌లు కంటున్నాడు. ఈ క్రిస్మ‌స్ బ‌రిలో స‌లార్ తో పోటీప‌డుతూ, ఒక‌రోజు ముందే డంకీ ప్ర‌పంచ‌వ్యాప్తంగా థియేట‌ర్ల‌లోకి విడుద‌ల‌వుతోంది. ఈ సంద‌ర్భంగా డంకీకి ఖాన్ ప్ర‌చారం చేస్తున్నారు. అలాగే ఈ సినిమా విజ‌యం సాధించాల‌ని మొక్కుతూ సెంటిమెంటుగా మునుప‌టిలానే ప్ర‌ఖ్యాత వైష్ణోదేవి ఆల‌యాన్ని ఖాన్ సంద‌ర్శించడం ఫ్యాన్స్ లో చ‌ర్చ‌నీయాంశంగా మారింది.

డంకీ విడుదలకు ముందు షారుఖ్ ఖాన్ వైష్ణో దేవిని ఒక సంవత్సరం(2023)లో 3వ సారి సందర్శించడం అంద‌రినీ ఆశ్చ‌ర్య‌ప‌రుస్తోంది. ఖాన్ సెంటిమెంట్ చ‌ర్చ‌కు తావిచ్చింది. ప్రతి సినిమా విడుదలకు ముందు వైష్ణో దేవి వద్దకు వెళ్లడం ఖాన్ ఆచారంగా మారింది! అంటూ ఫ్యాన్స్ వ్యాఖ్యానిస్తున్నారు. అంతేకాదు అమ్మ వారి ఆశీస్సులు అత‌డికి క‌లిసొస్తున్నాయి.

తాజాగా షారూఖ్‌ ఖాన్ ఆల‌య సంద‌ర్శ‌న‌కు సంబంధించిన ఒక వీడియో అంత‌ర్జాలంలో వైర‌ల్ అవుతోంది. షారుఖ్, అత‌డి పరివారం, అంగరక్షకులు, నిర్వాహకులతో జమ్మూలోని పవిత్ర మందిరం కోలాహాలంగా మారింది. ఆల‌య‌ శంకుస్థాపన మార్గంలో ఖాన్ బృందం నడుచుకుంటూ వెళ్ల‌డం క‌నిపించింది. షారూఖ్‌ తన నల్లటి పఫర్ జాకెట్‌లో హూడీతో క‌నిపించ‌గా, అతడితో పాటు మేనేజర్ పూజా దద్లానీ కూడా కనిపించారు.

సరిగ్గా ఒక సంవత్సరం క్రితం అంటే డిసెంబర్ 12న పఠాన్ విడుదలకు ముందు ఖాన్ వైష్ణో దేవిని సందర్శించారు. అత‌డు సుదీర్ఘ విరామం (నాలుగు సంవత్సరాల) తర్వాత పెద్ద తెరపైకి కంబ్యాక్ అయిన ప‌ఠాన్ అసాధార‌ణ విజ‌యం సాధించింది. ఈ చిత్రం ప్రపంచవ్యాప్తంగా రూ.1000 కోట్లకు పైగా వసూలు చేసింది. ఆ తర్వాత ఆగస్టులో జవాన్ విడుదలకు ముందు మళ్లీ వైష్ణోదేవి ఆల‌యాన్ని సంద‌ర్శించాడు. ఈ చిత్రం ప్రపంచవ్యాప్తంగా రూ.1100 కోట్లను వసూలు చేసింది. ఈ సంవత్సరంలో అతిపెద్ద హిట్‌గా నిలిచింది జ‌వాన్. ఇప్పటివరకు రూపొందించిన అత్యంత విజయవంతమైన హిందీ చిత్రాలలో ఒకటిగా నిలిచింది.

రాజ్‌కుమార్ హిరాణీ దర్శకత్వంలో షారుఖ్ డంకీలో క‌నిపించ‌నున్నాడు. మ‌రోసారి త‌న ఖాతాలో 1000 కోట్ల క్ల‌బ్ ని జోడించాల‌ని ఖాన్ క‌ల‌లు కంటున్నాడు. డిసెంబర్ 21న విడుదల కానున్న డంకీ, ప్రభాస్ సాలార్‌తో ఢీ కొననుంది. ఈ ఏడాది ట్రెండీగా షారుఖ్ తన సినిమా కోసం ఎలాంటి ప్రచార ఇంటర్వ్యూలు ఇవ్వ‌డం లేదు. అలాగే మీడియాల‌ను క‌ల‌వ‌క‌పోవ‌డం ఆశ్చర్య‌ప‌రుస్తోంది. అతడు మీడియాలో హంగామా సృష్టించ‌క‌పోవ‌డంతోనే ఈ విజ‌యాలు సాధ్య‌మ‌య్యాయా? అనేంత‌గా ఆశ్చ‌ర్యం వ్య‌క్త‌మ‌వుతోంది. మీడియా ప్ర‌చారానికి భిన్నంగా అత‌డు ఆల‌యాల్ని సంద‌ర్భించ‌డం ఆశ్చ‌ర్య‌ప‌రుస్తోంది.

డంకీ భార‌త‌దేశంలో అత్యంత భారీగా విడుద‌లవుతోంది. ఈ చిత్రంలో దిగ్గ‌జ న‌టులు న‌టించారు. టాప్ టెక్నీషియ‌న్స్ ప‌నిత‌నం ప్ర‌ధాన అస్సెట్ కానుంది. బోమన్ ఇరానీ, తాప్సీ పన్ను, విక్కీ కౌశల్, విక్రమ్ కొచ్చర్, అనిల్ గ్రోవర్, షారుఖ్ ఖాన్‌తో కలిసి నటించారు. JIO స్టూడియోస్, రెడ్ చిల్లీస్ ఎంటర్‌టైన్‌మెంట్- రాజ్‌కుమార్ హిరానీ ఫిల్మ్స్ సమర్పణలో రాజ్‌కుమార్ హిరాణీ-గౌరీ ఖాన్ నిర్మించారు. అభిజాత్ జోషి, రాజ్‌కుమార్ హిరానీ, కనికా ధిల్లాన్ ఈ చిత్రానికి ర‌చ‌యిత‌లు. డంకీ నలుగురు స్నేహితుల కథ. విదేశీ తీరాలను చేరుకోవాలనే వారి తపన… కలలను నిజం చేసుకోవడానికి ఎలాంటి సాహ‌సాలు చేసారు? చివ‌రికి అనుకున్న‌ది సాధించుకున్నారా లేదా? అన్న‌దే డంకీ సినిమా. ప్రేమ‌, స్నేహం, భావోద్వేగాల నేప‌థ్యంలోని సినిమా ఇది.

TAGS